P’Andecha Astur falten más midies sociales nel presupuestu que se presentó ayeri

3 Avientu, 2020

Presentaron una riestra de 18 propuestes qu’ incluyen moratories nos pagos de sirvicios y suministros básicos, posibilidá de solicitar l’anulación del pagu d’autónomos ya impuestos, un nuevu calendariu fiscal y garantíes d’atención en casu de necesidades básiques d’atención presonal, yá seyan motivaes por razones d’edá, movilidá, salú, autonomía presonal, situación sociollaboral, probeza, esclusión social, solitú, etc.,

La formación nacionaliega presentó a la Xunta Xeneral una propuesta pa modificar los Presupuestos Xenerales d’Asturies pal añu 2021 qu’incluya partíes económiques específiques que permitan implementar midíes de calter social.

L’escritu ta afitau nos datos de la European Anti-Poverty Network (EAPN)*, una plataforma europea d’entidaes sociales que trabaya y llucha escontra la probitú y la esclusión social nos países miembros de la Xunión Europea, que recueye nel so postrer informe qu’Asturies ye más probe que nunca, teniendo yá enantes l’andanciu la tasa probitú más alta dende que se recueyen rexistros oficiales. Esti informe asitía Asturies comu la fastera con mayor tasa de probitú severo del Estáu.

L’informe espeya que la situación de probitú n’Asturies yera previa al covid-19, ya que sigún recueye nel añu 2019 la tasa de probitú ya xubiere n’Asturies un 57%, algamando a cuasi una de ca cuatru presones: “El pior desendolcu de cualisquier comunidá na postrer década”. Depués d’esos datos, la situación nun fexo más qu’apiorar, en parte pol andanciu ya en parte pola nefasta xestión económica del país y la insistencia por parte’l PSOE de continuar coles mesmes polítiques económiques y sociales que llevaron a Asturies a pasar de ser una de les fasteres más prometedores d’Europa a ser el país con mayor tasa de presones en situación de probitú severo.

P’Andecha Astur ye urxente camudar esa llinia política y poner en marcha una braera política de proteición social, “que seya prioritaria, que sirva pa xenerar texíu económicu y que ponga remediu a la doliosa ya inxusta situación que se denuncia. Si esto enantes del andanciu yá yera necesario, agora mesmo ye urxente ya imprescindible”.

Pente les midíes incluyíes nes propuestes, que pasamos a resumir darréu, delles tan destinaes a compensar el ñidiu sesgu social del andanciu, otres sofiten a les piqueñes empreses y autónomos, amenorgándo les sos cargues y afalando’l consumu de lo asturiano, y otres munches van destinaes a garantizar l’atención a los más desfavorecios, tantu por vulnerabilidá económica comu física, mental o sicolóxica.

PROPUESTA DE CRITERIOS Y MIDÍES NEL ÁMBETU SOCIAL NA PREPARACIÓN DE LOS PRESUPUESTOS XENERALES D’ASTURIES PAL AÑU 2021

Reorientar toles polítiques sociales públiques pa sostituyir la so visión asistencialista pola prioridá del acompangamientu, el siguimientu y la inclusión rellacional y sociollaboral.
Una política d’aídes sociales diseñá específicamente pa compensar el ñidiu sesgu social que tien l’andanciu.
Moratoria nel pagu de suministros básicos nos domicilios (agua, gas, lletricidá…).
Moratoria nel pagu de sirvicios básicos de la vivienda (basoria, alcantarilláu…).
Camudu na regulación del IBI, fixanto una tasa especial pa viviendes de luxu, otra pa viviendes vacíes y regulando la esención de tases nel casu de viviendes con titulares en situación de precariedá, riesgu de probitú o riesgu d’esclusión.
Paralización de los desfiucies mentantu persista l’andanciu.
Entamar un parque públicu de vivienda per conceyos, destináu al arriendu con criterios de sofitu ya inclusión social.
Posibilidá de solicitar l’anulación del pagu d’autónomos ya impuestos pa les PYMES afeutaes polos preslles.
Camudu del calendariu fiscal d’impuestos y tases públiques, a nivel nacional asturianu y de conceyu, estableciendo facilidaes y bonificaciones pal presonal autónomu y pa los seutores de comerciu y hostelería, ente otros.
Regular los arriendos de llocales al pequeñu comerciu y la hostelería, fixando tanto topes comu midíes compensatories en casu de ceses d’actividá por motivos sanitarios o asemeyaos.
Entamar un Sirviciu Públicu Asturianu de Curiaos Universales que garantice a la población curiaos en casu de necesidades básiques d’atención presonal, yá seyan motivaes por razones d’edá, movilidá, salú, autonomía presonal, situación sociollaboral, probeza, esclusión social, solitú, etc., que collabore cola rede ciudadana que fonciona autónomamente nel ámbetu del sofitu solidariu.
Garantizar l’atención a domiciliu de les presones, dependientes o independientes, d’altu riesgu.
Meyorar l’atención en salú mental p’atender les consecuencies sicolóxiques de la cris.
Dedicación prioritaria de los Sirvicios Sociales públicos na identificación de presones en situación de necesidá, solitú, en riesgu o situación d’esclusión social.
Entamu d’un teléfonu públicu d’atención social.
Preparar el sistema educativu pa que la fienda teunolóxica nun perxudique a la reciella más desfavorecío.
Aídes publiques pa los seutores productivos propios y prioridá pa los productos asturianos nes grandes superficies comerciales.
Entamu d’una sociedá mercantil pública p’afalar la producción, l’asociacionismu productores y el consumu asturianu, con plataforma dixital pal comerciu direutu de productos asturianos y un alcuerdu pal tresporte mercancíes.