La única garantía ye la Oficialidá. Esa ye la rempuesta unánime de la comunidá asturfalante a les declaraciones del Conseyeru de de Ciencia y Universidá del Principáu, quien diz nun tener mecanismos llegales pa garantizar l’usu del asturianu en TFG de la Universidá d’Uviéu
Borja Sánchez señaló esti xueves en comisión parllamentaria que “nun existen mecanismos llegales” pa que’l Gobiernu autonómicu pueda garantizar l’usu del asturianu na defensa de trabayos fin de grau (TFG) na Universidá d’Uviéu.
Pesi a reconocer que la situación va en contra de la Llei d’Usu y Promoción del Asturianu, del Estatutu d’Autonomía, de los estatutos de la Universidá d’Uviéu, que señalen que se debe garantizar la non discriminación por usu de la llingua asturiana y que nel’artículu 4 del so reglamentu diz que “l’estudiante va poder indicar na matrícula, y siempre que la memoria de verificación del títulu lo permita, el so interés en realizar el TFG en dalguna de les llingües oficiales de la Unión Europea distinta a la española o en llingua asturiana, pudiendo axuntar nesi momentu acreitación de la so conocencia” y reconociendo tamién qu’esisten precedentes na presentación de tesis, trabayos fin de máster y fin de grau, el conseyeru remítese a la normativa universitaria, que desixe la oficialidá de la llingua na que se presenten los TFG.
Ello ye, pal “Principado”, si una llingua nun ye oficial los sos falantes nun tienen drechos.
Y tienen razón. Poro la solución pa finar con toos estos tracamundios surrealistes ye cenciella y ta nes manes de los mesmos que lo desixen comu imprescindible: aprebar la Oficialidá d’una bones y respetar los drechos de tolos asturianos.
Llástima que Barbón acabe de presllar esa posibilidá por un añu más.
Llucía F. Marqués
This work is licensed under a Creative Commons Attribution 4.0 International License.
