55 años d’hestoria industrial pasaron pela fábrica d’Amortiguadores Bulnes, agora Vauste, anantes conocía comu Monroe y Teneco, pasando peles manes del fondu utre Quantum Capital Partners y agora propiedá de NMR, empresa implicada tamién nel casu EBHI y la trama carbonífera

El 2013 namás la resistencia de los trabayaores y la fuerte movilización de tola ciudadanía xixonesa permitió que la multinacional norteamericana Tenneco presllare la so filial en Xixón. Púnxose entós en marcha un procesu acallentáu y consintíu de pieslle y desllocalización de la inversión que buscaba -CSI denunciolo dende’l primer intre y agora demuéstrase-  la ruina empresarial que xustificare esti preslle, procesu consintíu pol Gobiernu d’Asturies, amparáu pola FADE y sospechosamente inoráu polos sindicatos españoles (CCOO, UGT y USO)”.

Nel 2016 repitiéronse  les movilizaciones, que nun torgaron qu’el Gobiernu d’Asturies avalare la so venta al fondu d’inversión Quantum Capital Partners, fondu utre ricu’n desmantelamientos d’empreses y que, a lo llargo los sos 4 años de xestión incumplió sistemáticamente los compromisos alquiríos, ante la impasibilidá de les autoridaes y de la mayoría de los sindicatos. Nel añu 2019 l’entós conseyeru, Isaac Pola, llegó a afalar publicamente la xestión de Quantum, ñegando’l riesgu de desllocalización.  Nel mesmu añu, entá ensin un plan de viabilidá qu’asegurare la carga llaboral a la empresa, Vauste  ye revendía al fondu de los Emiratos Árabes DSA, al traviés de la so marca Natural Mining Resources (NMR) .

NMR, con domiciliu’n Madrí, ye la mesma empresa implicada  nel conflictu llaboral d’EBHI, empresa pública, siendo la beneficiaria del desvíu de carga de trabayu y una de les posibles beneficiaries d’una cris por descapitalización n’EBHI que llevase a esta empresa pública d’estiba a la privatización. Tamién ta implicada na trama de la descarbonización: non en baldre NMR recibió de l’Autoridá Portuaria de Xixón (organismu de titularidá pública) una cesión de 10.000 metros cuadraos, nos que criba carbón foriatu, mécelo con escories y reviéndelo, moviendo más carbón del que xeneraron en so díe les mines asturianes y dexando n’evidencia la falcatrua de les intenciones ecolóxiques de la “descarbonización”. A los pocos meses de mercar Vauste, NMR presenta un concursu voluntariu d’acreedores asociáu a un plan de viabilidá, nel que ya adelantaben que sedríen dispidíos pente 40 y 60 trabayaores y que plantega una baxada de sueldos del 20%.

Esti plan de viabilidá siguió p’alantre y son finalmente 60 los trabayaores que sedrán despidios, nun de los intres más duros pal mercáu llaboral.

Demientres tou esti tiempu, los dellegaos sindicales de Vauste CSI, que lleven 4 años prediciendo esti desendolcu, foren acosaos, illegalmente sancionaos, atacaos llaboral, personal y sindicalmente, con denuncies falses que se cain nos múltiples xuicios…El caberu guelpe recibíenlu recientemente, cola detención de Fernándo Álvarez, Zape, téunicu de caltenimientu y dellegáu sindical, ya en lliberta pero acusáu  de “actos vandálicos tantu contra la empresa como contra representantes de los otros sindicatos presentes nel comité”. La empresa, denuncien los trabayaores, ya ta faciendo movimientos pa facer negociu col suelu nel que ta afitada, nuna operacion que, sigún la CSI, podría considerase un alzamientu de bienes.

La llucha nun paró’n dengún intre, pero la complicidá de la prensa, el gobiernu y los sindicatos CCOO, UGT y USO ya’l protagonismu cuasi esclusivu del Covid 19 restaron visibilidá al conflictu.

Ayeri los trabayaores de Vauste protagonizaron un impautante actu, cargando colos sos propios ataudes llaborales, nos que se podía ver el nome de los despidios y les sos families, visibilizando l’impautu rial de les midies adoutaes pola empresa y denunciando la complicidá de los cabezaleros del partíu gobernante y otros sindicatos na empresa.

This work is licensed under a Creative Commons Attribution 4.0 International License.