Sonia D. González, militante d’Andecha Astur, entró na que foi pa munchos asturianos la única opción posible: la hostelería.  Aguantó munchos años coles pésimes condiciones llaborales qu’impón el seutor y qu’imposibiliten cualisquier aforru a los sos trabayaores. Agora alcuéntrase con una situación na que la hostelería funde y lleva con ella per delantre a un altísimu porcentaxe de la población asturiana

¿Qué consecuencies tendrá esti preslle forciau pa los hosteleros asturianos?

Van presllar munchos negocios. Aguantarán navidaes y pasando les fiestes presllarán, lo mesmo que tiendines piquiñines. Sedrán les multinacionales, les grandes empreses, que son les que tienen un bon respaldu pa superar esta crisis, les que se faigan col mercáu, y nun falo namás de la hostelería nin solo del piqueñu comerciu, falo de les piqueñes empreses que nun van aguantar el tirón, de los autónomos que tan viéndose en situaciones incaltenibles.

Lo más grave ye qu’esto nun pilló a naide de sustu, sabíemos que diba pasar. Sabíase que l’hosteleru ya’l turísticu ye un seutor vulnerable, pero sicasí presentóse a los asturianos comu la única opción de futuru. Sabíase que’l andanciu diba llegar ¿Qué pensaron, que nos protexía Cuadonga? Y agora na segunda fola, torna a topanos ensin preparar, ensin una rede económica ni social que protexa a los asturianos, cola sanidá desaniciada ya ensin aprofitar los medios colos que cuntamos –comu’l Hospital de Builla preslláu entá agora- ensin xente preparao, ensin medios, dexando que la xente s’arruine, dexando morrer a los vieyos d’esta manera tan tremenda, pudiendo prever tou esto, lo único que se fae ye culpabilizar a la población. Lo que fixo esti gobiernu ye criminal.

¿Cómo definiries la situación que se ta viviendo na hostelería asturiana?

Nel tema la hostelería hai muncho que falar y munchos puntos de vista estremaos pa enfócalo, pero a curtiu plazu y agora mesmo, ye un seutor qu’hai que defender. Hai que replantegase’l so furrulamientu, especialmente no que cinca a drechos llaborales y al enfoque turísticu de mases, sí, pero si nun queda na, nun va haber na que replantegar, namás un ermu llaboral ya económicu.

Si s’acaba la hostelería ya’l turismu ¿de qué vive media Asturies? Nun ye namás los negocios direutamente implicaos, el ganaeru vende la carne a les carniceries, que coles mesmes vende al restaurante, al hotel… les queseríes venden más pa los que vienen de fuera o pa consumir en hostelería que’n venta direuta a los asturianos, y col restu’l seutor agroalimentariu pasa lo mesmo. Cola hostelería presllada, naide vende.

Preslláronmos toles demás salies económiques, los precios de la carne desplomáronse, la burocracia, la falta de servicios, la mala xestión del ámbetu rural foi dexando’l turismu comu única salida, una salida que, comu llevamos décades denunciando, nun ye fiable. Pan pa güei y fame pa mañana, sabíemos que ye’l sector más vulnerable ante los cambeos, el que primero cae en casu de crisis.

Forciaron a la xente a vivir de la hostelería y agora vémonos asina, ensin posibilidá de trabayar, ensin tener de qué vivir. Los ERTES, en munchos casos, entarden meses en cobrase –yo mesma sigo esperando por cobrar el primeru, d’abril- y les famoses ayudes, aparte de llegar tarde, son risibles. Ye preciso una moratoria nel pagu de les cuotes d’autónomos, alquileres y suministros, porque nun ye de recibu pagar cuando nun se pue trabayar, pero lo que ta pasando ye mui estremao: la hostelería, neto que’l restu les empreses, recibieron esti mes la subida de les cuotes d’autónomos, asina comu, en dellos casos, del pagu de módulos.

Y sabemos tamién, y agora entro nel viniente puntu de vista, que ye’l seutor que mayor precariedá llaboral xenera. Contratos temporales, nos que se trabaya unos meses a ritmos inhumanos –yo llegué a trabayar 19 hores del tirón, nel oriente ye avezao que se trabaye ensin descansos de xunu a setiembre- pa tar el restu l’añu en paru, pendiente de dalgún ponte,

comu el que s’acaba de perder, pa dir tirando.  Los abusos de la patronal, los incumplimientos contractuales, los horarios ensin fin y los impagos tan al orden del díe; pero eso nun pue xustificar, agora mesmo, el nun defender a la hostelería.

Entos, ¿Ye llícito defender los intereses d’unos empresarios que –la mayoría, non toos- abusen de los sos trabayaores?

Si. Los emplegaos del seutor hostelería necesitamos trabayar y pa ello ye imprescindible que toos defendamos la hostelería, pero non como dalgunos empresarios proponen, lliberalizando el despidu y cargando les consecuencies sobre’l trabayaor, sinon tolo contrario.

Tenemos que ser quien a facer d’esti un puntu d’inflesión nel que, al tiempu que se saca alantre’l sector hosteleru, se replantegue tol so furrulamientu de manera que los trabayos que d’elli dependan seyan dignos. Ye urxente la implantación de mecanismos de control qu’aseguren el cumplimiento de la llexisllación llaboral.

Pero, dempués de les masificaciones d’esti branu, hai munches voces contraries al turismu. ¿Sigue siendo la meyor opción p’Asturies?

A más llargu plazu, hai que replantegar dafechu la xestión del turismu n’Asturies. Lo d’esti vranu fue una llocura, cola invasión de turistes atrayíos pola publicidá “Llibre de virus” que fexo Barbón, pero esto nun ye asumible, nin cultural, nin económica, nin llaboralmente. Tornaron Astuires nun parque temáticu nel qu’estorba tou lo que seya d’equí y los paisanos somos parte de la decoración. Ye imprescindible una regulación y la creación d’un focu de turismu respetuosu y de calidá, pero ye necesario tamién reactivar el restu de sectores económicos, pa que vivir de la hostelería dexe de ser malvivir y pa que trabayar nesti seutor torne a ser una elleición, non la única salida posible pa los asturianos.

This work is licensed under a Creative Commons Attribution 4.0 International License.