Col dineru recaldáu cola vienta de los calendarios Biodevas va poner en marcha un proyeutu ambiental de baldre a lo llargo’l 2021

Na ellaboración d’esti calendariu Biodevas esforcióse tantu na estética como nel conteníu, con un resultau que de la que ye prestosu apurre tamién conocencies básiques sobro la fauna menaciada n’Asturies. El so oxetivu ye llegar a persones que, ensin ser espertes, tán esmolecíes pola naturaleza y coles mesmes, averar la so guapura a aquelles otres qu’entá nun tán interesaes pel mundu natural, tratando d’implicales.

Precisamente neso consiste Biodevas, asociación creada “por y pa persones non espertes en temes medioambientales y entá asina esmolecíes pola naturaleza. Tratamos de tresmitir el ciñu pola naturaleza que sentimos y les conocencies fayadices pa esfrutar d’ella de manera respetuosa”.

El calendariu, que tien un preciu de vienta de 5 euros, ye de paré en tamañu de fueya DIN A4 y cuenta con illustraciones d’especies de la fauna selvaxe, realizaes pola Deva Lucía Fernández-Castillo Suárez y acompangaes d’un pequenu testu desplicando por qué ta menaciáu dichu animal. La información sal del Llibru Coloráu de la Fauna d’Asturies.  El calendariu señala, amás de les festividaes, los díes mundiales importantes dientro del mundu del medioambiente, amás de les festividaes.

Col dineru recaldáu cola vienta de los calendarios van desendolcar a lo llargo del añu 2021 un proyeutu d’acesu públicu y de valdre.

Vitor Corte

This work is licensed under a Creative Commons Attribution 4.0 International License.