Demientres los resultaos baxen n’España, que queda perbaxo la media Europea, Asturies destácase pente los países con meyores resultaos en Ciencies y Matemátiques

Los resultaos del caberu informe TIMSS, que valora los conocimientos demostraos nes prebes feches nel 2019 a los escolinos de cuartu Primaria de 64 países en materia de Matemátiques y Ciencies, alluguen a los escolinos asturianos pente los meyor formaos nestes materies. Asina, mientres en Matemátiques la media de la Xunión Europea ta en 513 y n’España, en 502, Asturies algama once puntos más, 524, teniendo per delantre namás a dalgunos países de la OCDE. No que cinca a Ciencies, los resultaos son entá más favoratibles, allugándose los asturianos pente los meyores de los 64 países participantes, con una media de 534 puntos, mui lloñe de los resultaos d’España (511), de la Xunión Europea (514) y de la media de los países de la OCDE (526). Otru datu interesante ye que namás 2 de cada 10 estudiantes tienen un nivel baxu y prauticamente dengún algamó notes del nivel inferior, ello ye, con notes de 3 o menos.

Cuasi 900 escolinos de cuartu, de 500 centros escolares, participaron nos esámenes nos que se midía el nivel d’aritmética, xeometría y análisis de datos, nel epígrafe de Matemátiques, y el de ciencies físiques, de la vida y de la tierra en Ciencies.

Redaición InfoAsturies