Nun ye namás la hostelería. La tasa añal de produción industrial cayó un 5% n’Asturies n’ochobre y alrodiu de 21.000 autónomos pidieron el cese d’actividá pente ochobre y payares. Espérase que la situación apiore dempués de les fiestes navidiegues
La información del Istitutu Nacional d’Estadística señala que l’Índiz Xeneral de Produción Industrial (IPI) baxó un 5% el mes d’ochobre del 2020, en relación al mesmu mes de 2019 n’Asturies, mes que fixo saltar les alarmes l’añu pasáu polos sos pésimos datos. La cayida acumulada a lo llargo del añu ye d’un 15’5%, sobro una industria que yá perdiere 23.000 puestos de trabayu ente’l 2000 y el 2019.
Tolos seutores fueron afeutaos por esti retrocesu, pero especialmente la industria del cueru y del calzáu, con una perda añal del 29,7%, y la fabricación d’otru material de tresporte, qu’amenorgó la so producción nun 20,8%. Los bienes d’equipu rexistraron un retayu del 9,6% y los de consumu non duraderu un 8,4%; inclusive la enerxía retayó la so producción, con un descensu del 3’8%.
Mientres el mes d’ochobre rexistráronse tamién 4.000 ceses d’actividá per parte de trabayadores autónomos y nel de payares (del qu’entá nun tenemos datos relativos a la producción industrial) cuadriplicáronse llargamente les baxes, algamando les 17.000 nun solu mes. Anque munches d’estes baxes tán direuta o indireutamente rellacionaes col seutor de la hostelería, son munchos otros profesionales los que tán viendo que-yos ye imposible siguir viviendo de la so actividá avezá y ca vegada son más les tiendes y negocios que llucen cartelos de zarru y lliquidación. Dende l’Asociación d’Empresarios alverten: lo peor ta por llegar, yá que son munches les tiendes que tán aguantando p’aprovechar la temporada navidiega anantes de la so lliquidación.
Tolos seutores de la población tan naguando por sentir les midies de sofitu social y de recuperación llaboral que tien pensao poner en marcha con urxencia el Gobiernu del “Principado”, pero entá nun hai denguna noticia al respeutu. Barbón diz que pongamos la mázcara.
Llucía F. Marqués
This work is licensed under a Creative Commons Attribution 4.0 International License.
