Esti sábadu y domingu, 12 y 13 d’avientu diez de los meyores influencers viaxeros de sonadía qu’emiten n’Instagram, Youtube o TikTok tarán en Xixón
Esti fin de selmana, aterriza en Xixón la edición segunda de Travel Pop Up by IATI, un eventu tresmitíu’n direutu dende Xixón y presentáu pola viaxera xixonesa Ana Rellán, del proyeutu Zapatillas por el Mundo. L’eventu ta empobináu al públicu xeneral y creadores de conteníu que quieran inspirase nes histories de viaxeros de sonadía n’Instagram, Youtube y TikTok.
Esta nueva edición axunta a más de 10 youtubers ya influencers de viaxes, ente ellos: Enrique Alex, el canal de Youtube númberu 1 n’España; Mariel de Viaje, la bloguera de viaxes de mayor sonadía’n Méxicu y, anguañu, una de les ocho grandes muyeres viaxeres del mundu, según el periódicu El País; Álex Tienda, ún de los youtubers de viaxes más famosos de fala hispana con más de 2 millones de suscriptores.
A lo llargo los dos díes los asistentes van esfrutar de delles actividaes con estos creadores de conteníu nes redes sociales: charres, entrevistes cara a cara, talleres y fasta un alderique sobro teunoloxía y movilidá pa un desendolcu caltenible cola participación de Jaime de Jaraiz Lozano, presidente y CEO en LG Electronics Iberia; Fátima González, direutora rexonal Europa del Sur en Ecosia; y Busan Moon, viaxeru que percorrió 21.000km en coche llétricu dende Les Canaries hasta Corea’l Sur.
Otres viaxeres y viaxeros que tamién formen parte del cartelu de 2020 son Alicia Aradilla, trotamundos española y famosa illustradora de viaxes que recién asoleyó una guía illustrada xunto a Condé Nast Traveler, Dustin Luke, el youtuber norteamericanu más porteñu y famosu na Arxentina, Cristina Verdú y Gustavo Karlsson, una pareya viaxera GoPro Family Member, Christian Byfield, ún de los viaxeros más perconocíos en Colombia, Dos locos de Viaje, la pareya de viaxes con mayor audiencia en Venezuela los Gemelos Viajeros, tiktokers de viaxes españoles virales en TikTok, Azul Místico, viaxera española que vive en Londres y ex azafata de vuelu con más de mediu millón de siguidores y Patoneando, bloguera de viaxes colombiana que, dende va 6 años, viaxa sola.
- Entraes: www.travelpopup.es
Redaición InfoAsturies
This work is licensed under a Creative Commons Attribution 4.0 International License.
