El Grupu Inmatriculaciones Asturies, Asturies Laica y Andecha Astur vienen desixendo al Gobiernu, dende va años, qu’apurra la relación completo y detallao de los bienes inmatriculados nos Rexistros de la Propiedá, por aciu una simple certificación eclesiástica, pola ilesia católica, bienes qu’inclúin -hasta onde se sabe- la práutica totalidá del prerrománicu asturianu, amás d’otros munchos inmuebles propiedá del pueblu que la ilesia apoderós indebidamente, superándose’l mediu millar
El Ministeriu de Xusticia español dispón, de magar el 6 de febreru de 2018, d’una relación de 34.984 bienes inmatriculados ente 1998 y 2015 en tol estáu, por aciu esti procedimientu de costitucionalidá cuestionada inclusive pol Tribunal Européu de Drechos Humanos, cantidá que pue ser solo la punta visible del iceberg, una y bones les inmatriculaciones empecipiaren nel 1945.
El Conseyu de tresparencia y Bon Gobiernu encamentó al Ministeriu de Xusticia a faer pública esta información, pero esti optó por recurrir el resolvimientu y nun facilitar la información de la que dispón, utilizando argumentos miqueros como que la información ta ensin ellaborar, cuando lo que se solicita ye la información yá esistente o retrasos debíos a la situación sanitaria, cuando se trata d’unviar unos correos lletrónicos, lo qu’evidencia la intención per parte del gobiernu de siguir faciéndo-y el xuegu a la ilesia y despintando datos a los ciudadanos. Per otra parte,  esto ye un incumplimientu esplícitu de los Programes Elleutorales de los partíos que conformen el gobiernu actual, el Programa Gobiernu de coalición PSOE – XUNÍES/PODEMOS y les mesmes palabres pronunciaes pol presidente Pedro Sánchez na so sesión de investidura.
El PSOE, nel se 2.3.1. del so programa electoral, establez “la recuperación de bienes inmatriculados indebidamente pola Ilesia”.
PODEMOS, nel separtáu 137 del so programa elleutoral, establez “Recuperar los bienes inmatriculados indebidamente pola Ilesia. Estes operaciones basáronse, hasta 2015, nel privilexu d’iscribir nel Rexistru de la Propiedá bienes a partir de simples declaraciones de los sos propios miembros(…) La salú democrática del nuesu país esixe qu’esto se revise a xeitu”.
El Programa del Gobiernu de coalición PSOE – XUNÍES/PODEMOS (30-12-2019), nel separtáu 5.11., establez “Vamos Faer los cambeos llexislativos oportunos pa facilitar la recuperación de los bienes inmatriculaos indebidamente pola Ilesia basaes nel privilexu d’iscribir nel Rexistru de la Propiedá bienes a partir de simples declaraciones de los sos propios miembros”.
Y, a lo último, l’actual Presidente del Gobiernu d’España, Pedro Sánchez, nel so Discursu Investidura (04-01-2020), dicía “Señoríes, nun Estáu aconfesional nun tien sentíu que nenguna confesión asítiese percima de la llei, nin esfrute de privilexos que manquen el principiu de llegalidá y el principiu d’igualdá y por esa razón el Gobiernu va realizar los cambeos llexisllativos oportunos -yá los anuncio- pa facilitar la recuperación de los bienes que fueren inmatriculaos indebidamente pola Ilesia”.
Poro, n’ares de la tresparencia que tien d’emponer toa sociedá democrática, el Grupu Inmatriculaciones Asturies reclama que se retire darréu’l recursu presentáu pol Ministeriu de Xusticia contra’l Resolvimientu del Conseyu de Tresparencia y Bon Gobiernu y se tresllade la información disponible (1998-2015) a tolos grupos parlamentarios y a aquelles entidaes qu’asina lo solicitaron, completándose amás esta información percanciando, pol mecanismu que se considere oportunu, les inmatriculaciones que falten: les realizaes pola ilesia ente 1946 y 1998.
Seya que non, hai que partir de que toles iscripciones realizaes con posterioridá a 1978 han de considerase nules de plenu drechu por utilizar un mecanismu (auto-certificación eclesiástica) que supón una actuación incostitucional sobrevenía, yá criticáu pol mesmu Tribunal Européu de Drechos Humanos.

Redaición Infoasturies

This work is licensed under a Creative Commons Attribution 4.0 International License.