El respetu estremu a les midíes de seguridá sanitaria, na que precisamente son espertos los manifestantes -la gran mayoría profesionales de la salú- llevó a que munches de los miles de persones que s’averaron a sofitar la Fola pola Sanidá  quedáren fora, por falta d’espaciu nel Muriu; munchos d’ellos decidieron finalmente crear una cadena paralela, dixebrada de la primera, de manera que cuando entamó la Fola que percorrió la sablera esta doblóse en dellos puntos, convirtiéndose en mareona, de les de cachones, como se llama en Xixón a les foles que salten el Muriu.

Separtaos pente sí por un cordón, facilitáu pola organización, los manifestantes reclamaron silenciosamente una meyora nos medios y nes condiciones llaborales del personal que permitan al tiempu ameyorar la calidá asistencial.

Na llectura del comunicáu previu a la Fola, acusaron a l’alministración d’una xestión incompetente que dañó la calidá de la sanidá pública asturiana, polo xeneral, y la del ária V -Hospitales de Cagüeñes, Xove y Cruz Roja- en particular,  y que llevó a los hospitales xixoneses al desborde, cargando’l pesu de la falta de medios y de personal sobre los trabayadores, complicando l’atención óptima a los pacientes. Apuntaron tamién a la baxa calidá de los contratos a sanitarios como un de los principales focos del problema de la falta personal y desixeron cambeos anantia que se vean enfrentaos a la “tercer fola” del Covid-19 ensin salir siquiera entá de la segunda.
“Nesta llucha tamos toos y toes. Porque toos vamos precisar de daqué tan básico  como la Sanidá. Curiar d’ella ye responsabilidá de toos”.