L’Asturianu, esa llingua de la qu’entá hai quien pon en dulda la so esistencia, pero que cunta con una hestoria académica d’un sieglu, cellebra’l 40 aniversariu de l’Academia que y da puxu nos caberos tiempos
Los oríxenes de la ALLA remontense a finales del sieglu XVIII, en forma de proyectu recoyíu nes cartes intercambiaes ente Melchor Gaspar de Xovellanos y González de Posada a lo llargo del añu 1791, proyeutu qu’el so destierru torgó llevar a cabu. Nos años 20 nació la Real Academia Asturiana de les Artes y les Lletres, que’l so principal -pero non únicu- oxetivu yera la realización d’una gramática y un diccionariu de la llingua asturiana, polo que podríamos dicir qu’anguañou va un sieglu que Asturies cuenta cola so propia Academia.
L’actual Academia de la Llingua Asturiana foi creada pol “Conseyu Rexonal” el 15 d’avientu de 1980, fai güei 40 años, colos fines estatutarios d’investigar, normalizar gramaticalmente l’asturianu en toles sos variedaes, inventariar el so lléxicu, promover el so espardimientu, regularizar la so enseñanza, fomentar el so usu como mediu d’espresión de los asturianos, promover concursos lliterarios, realizar estudios llingüísticos y velar polos drechos llingüísticos de los asturianos. De magar, dende les instituciones nun se fixo más qu’enzancar el so llabor, poniendo toles torgues posibles a la normalización, l’usu y sobremanera, el respetu a los drechos llingüísticos de los asturianos. Anguañu, la ALLA ta compuesta por un total de 56 miembros y otros 20 académicos d’honor, -dándose’l casu que solo diez d’ente toos ellos son muyeres-, persones que destacaron por poner el so enfotuy conocencies a serviciu de la llingua asturiana.
Nesta fecha ye importante, poro, reconocer el duru trabayos desenvueltu polos académicos y académiques nel campu de la normalización y la normativización del asturianu, esperando que llueu cunten cola ferramienta necesario por que puedan garantizar a los asturfalantes los sos drechos llingüísticos, la oficialidá.
Como reconocencia pol so llabor, dende Iniciativa pol Asturianu van proponer al Gobiernu d’Asturies que se-y conceda la Medaya d’Oru d’Asturies a l’ALLA por estos 40 años defendiendo y dando puxu al asturianu.
Redaición InfoAsturies
This work is licensed under a Creative Commons Attribution 4.0 International License.
