Esti casu torna a trayer el tema del grave problema de desdexamientu que carecen estes costruciones, de descomanada importancia pal padremoñu asturianu; en cualisquier conceyu d’Asturies pueden alcontrase horros, paneres y cabazos a piques de cayer, pero nes caberes sovenciones convocaes pa la so recostrución, namás un de los solicitantes algamó l’ayuda pa igualu

Les causes del incendiu qu’amburó dafechu l’horru na llocalidá quirosana de Salcéu son entá desconocies y de xuro nun se fadrá investigación oficial dala pa esclariar les circustancies nes que s’anició’l fuéu. Nesti casu, la quema entamó pela nueche, pero dengún vecín lo vió fasta la mañana, polo que desanició dafechu l’horru, ensin posibilidá de recostrución colos sos materiales. L’horru taba allugáu pente una cuadra, una tená y delles cases, a los que nun casó dengún dañu.

La reciente perda del Horru de Vis, especialmente renomada por calter hestóricu del mesmu, nun fexo recapacitar nin tomar les midies afayaices pa protexer esti ellementu de la cultura arquiteutónica asturiana y les promeses de recostrución y de búsqueda de responsabilidaes quedaron pa práu, daqué polo que la fiscalía ta investigando -por pidíu d’Andecha Astur- el papel xugáu nel casu por Adrián Barbón, Berta Piñán, l’alcalde d’Amieva y los dueños del Horru.

This work is licensed under a Creative Commons Attribution 4.0 International License.