“El preslle de la hostelería pal día once ta robláu de man”. Hosteleros de toa Asturies tán recibiendo audios de whastsapps d’estremaes persones qu’afirmen cuntar con información de primera man sobro un nuevu zarru apautáu de man pola patronal de la hostelería, OTEA, ya’l Gobiernu del “Principado”

La hostelería asturiana abría esta selmana les sos puertes con un amiestu d’esperanza y medrana pol so futuru: tantu empresarios como emplegaos precisaben esta reapertura pa caltener el so mediu de vida. Y non solo ellos, provisores, distribuidores, encargaos de caltenimientu… toos allegaron a trabayar col apuru de recuperar el tiempu perdíu y cola vista puesta nos próximos meses, avisiega pola espada de Damocles d’un nuevu preslle.

Ayeri unos mensaxes de whatsup fixeron correr la noticia de que tou esto ocultaba una mentira que los afeuta a toos, un pautu robláu de man ente Jose Luis Álvarez Almeida, presidente de Otea, y el gobiernu d’Adrián Barbón, que-yos dexaría “salvar” la campaña de Navidá a cambiu de apautar anticipadamente un nuevu zarru pal día once de xineru, pero ensin informar a los afeutaos. Los rumores, entá ensin confirmar, inclúin la posibilidá de la integración de Almeida nes files del PSOE. L’orixe de la filtración taría na familia cercana del mesmu presidente d’OTEA.

De confirmase esti alcuerdu, non solo taría xugandose coles esperances y el mediu de vida de miles d’asturianos, sinón que corroboraría la impresión xeneralizada de que l’apertura de chigres, sidreríes y restoranes nun respondió a criterios sanitarios, sinón puramente económicos y políticos.

Redaición InfoAsturies

This work is licensed under a Creative Commons Attribution 4.0 International License.