Dica mediaos d’esti mes la vienta direuta de productos ganaeros, de les güertes o artesanales yera considerao un delitu

El Conseyu de Ministros del Estáu Español aprebó esti mes una midía llargu tiempu esperada polos trabayaores del sector primariu y retrasao polos lobbies del sector alimentariu. Trátase de la normativa qu’autoriza la vienta de productos artesanales y tradicionales direutamente dende pequenes esplotaciones. El testu aprebáu da garantíes a los pequeños productores y llibéralos de les barreres que torgaben a los entamaores rurales poder realizar vienta direuta dende les sos esplotaciones. La midía afeuta sobremanera a les pequenes esplotaciones ganaderes, que, nel casu de los sectores avícola y cunícola, van poder facer sacrificios nes sos instalaciones, solucionando un problema llargamente aldericáu n’Asturies, onde nun se cuntaba con mataeru específicu. Tamién ta permitío vender direutamente productos ellaboraos tradicionales, cumpliendo siempres les másimes garantíes hixénico sanitaries y siempres que’l puntu de vienta (mercaos, pequenos comercios…) nun s’atope a más de cien km. del llugar de produción. Previsiblemente, esto permitirá la vienta direuta de productos caseros que fasta agora teníen difícil salía al mercáu, comu la sidre’l duernu o la mantega.

El Decretu Llei permite buscar víes de comercialización alternatives, oldeando los drechos de los nuesos productores a los del restu de la Xunión Europea, onde’l mercáu de proximidá ta perfectamente asumíu y llegalizáu va décades.

Llucía F. Marqués

This work is licensed under a Creative Commons Attribution 4.0 International License.