Un añu más Andecha Astur honra la memoria del poeta asturianu Andrés Solar (1955/1984) conocíu pol so compromisu con Asturies que tan bien supo espeyar nos sos poemes

Esti domingu 27 d’avientu, a la una del mediudíi nel Cimenteriu de Deva Andecha Astur –heriedera del ENA, fundau pol poeta- homenaxearán, como cada añu, la so figura, resaltando el so fondu compromisu nacionaliegu, faceta d’esti afamáu escritor que ye davezu escaecía.  lleendo dalgunes de los sos poemes más conocíos y con una ufierta floral frente a la placa que la organización llantó hai años a la entrada del campusantu.

Miembru fundaor del Ensame Nacionalista Astur, presentándose por esi partíu como candidatu a la Xunta Xeneral, foi  profesor de llingua asturiana na UP de Xixón,  espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi tesoreru de l’Asociación d’escritores Asturianos y miembru de Conceyu Bable y deXunta pola Defensa de la Llingua Asturiana, siendo en tou momentu un referente pola so implicación, capacidá de trabayu y cualidaes presonales, Andrés Solar Santurio algamó na so curtía vida merecíu reconocimientu como autor, finando traxicamente con namás 29 años, cuando’l so maurecer como escritor yera yá un fechu ciertu qu’apuntaba cumes insospechaes, dexándonos escrites estes prestoses pallabres, tan vixentes pesi a los años pasaos y que tan bien espeyen el sentir y los enfotos del nacionalismu asturianu

Vamos dexar de vivir

de gaita sidra y tambor,

de la Santina na cueva

y de castros baxo’l sol.

————————

Óyense voces falando

de pueblos y llibertá,

de roses llorando espines,

de palombes y un riscar.

———————–

Xunto la fábrica encesa,

la mina prieta, la mar

y la secha ensin llabrar:

asperámoste pruyendo

por vivir pallabres vieyes

comu pueblu, home y llar.

————————-

Prúyemos un pueblu llibre:

que ñome cola xo voz

los sos collacios y el pan.

Prúyemos un pueblu llibre

y una Asturies dixebrá

This work is licensed under a Creative Commons Attribution 4.0 International License.