Fernando Nicolás Velasco

Asturies ye comu’l fíu  que se niega a abandonar el llar de los sos pas y se llenda a pasar los díes en piyama, ensin visión pol so futuru, ensin querer meyorar la so esistencia, rexía namás poles normes de los sos proxenitores, marchitando al so mesmu ritmu. Anclá nel pasáu, viviendo una falsa seguridá

La mayoría d’edá, como ellementu llegal, confier a les persones una riestra de drechos y obligaciones de magar el cumplimiento d’unos determinaos años. D’avezu, comu asocede na mayor parte los estaos ocidentales, afítase a partir de los 18.

Los ciudadanos, a partir de esti momentu, son plenamente responsables de los sos actos, exceuto cuando obviamente concurran circustancies que llimiten les sos capacidaes mentales, y nun precisen d’una tutela exercía por otres persones sobre ellos.

Salvo casos perpocu frecuentes, les persones tienen necesidá d’esnalar soles, tomar les sos propies decisiones, costruir el so futuru y nun depender de los designios d’otros sobre les sos cuestiones fundamentales. Les persones, cierto ye que con determinaes llimitaciones marcaes pola llei pa que la convivencia seya xusta y ensin abusos, son llibres.Colos sos drechos y obligaciones, pero llibres.

Gracies a esta llibertá, decidimos si queremos casanos y con quien lo facemos. Tamién valoramos los nuesos enfotos profesionales y cuanto tamos dimpuestos a sacrificar pa conseguilos. Tomamos, o non, parte activa en defensa de lo que consideramos xusto. Vamos a vivir a tal o cual sitiu, y mercamos una casa. En definitiva, tenemos unos suaños que perseguimos polos nuesos propios medios (y qu’una sociedá realmente xusta aidaría a conseguir, pero esi nun ye tema d’esti artículu)…. A la fin, cumplimos coles nueses obligaciones, exercemos los nuesos drechos y de dalguna mena, lluchamos por amplialos.

Sobra decir que la mayoría d’edá llegal ye un sucesu xurídicu, pero que les persones, de forma xeneral, algamamos un estáu natural de “adultos”. Y entos deseyamos tomar les riendes de les nueses vides. La mayoría d’edá consolida llegalmente esi estáu.

A les sociedaes, como ye lóxico, nun se yos otorga esa mayoría d’edá. Pero si que cabe evaluar y analizar cuando una sociedá pue considerase adulta.

Talo que les presones a entítulu individual, una sociedá algama la so mayoría d’edá, o estáu adultu, o maduru, como queramos llamalo, cuando se decide a tomar el mandu y el rumbo de la so esistencia. Cuando nun se dexa mangoniar por otra y cuando fae de les sos necesidaes y los sos valores el so cimeru oxetivu. Una sociedá mayor d’edá nun pue tar maniatá y viviendo a la solombra d’otra. Asina pierde la so idiosincrasia y los elementos que la faen particular, y eslíese dientro d’esa.

Anguañu y como sociedá, Asturies ye menor d’edá. Pero porque quier selo. Ye comu’l fíu  que se niega a abandonar el llar de los sos pas y se llenda a pasar los díes en piyama, ensin visión pol so futuru, ensin querer meyorar la so esistencia, rexía namás poles normes de los sos proxenitores, marchitando al so mesmu ritmu. Anclá nel pasáu, viviendo una falsa seguridá.

Los problemes d’Asturies, que nun son pocos, nun s’igüen pidiendo aida a Madrí. Un neñu, menor d’edá, pue riquerir la intervención de los sos pas cuando s’alcuentra’n dificultaes, pero un adultu tien la obligación moral de resolveles por si mesmu. Ente otres coses, porque los sos pas ya nun son quien a agabitalu. Y los sos pas, que tamién son persones, aportará l’intre en que necesiten y quieran resolver les de so en primer llugar.

La sociedá asturiana tien de tomar concenxa de lo que ye y lo que quier ser. Tien de comportase comu adulta y mirar a los demás comu iguales, non comu superiores. Nun tien de tener miéu a los desafíos del mundiu, o nunca podrá sortealos. Ye necesario que tena los sos suaños y afite les sos metes, y non dexar que seya’l gobiernu central el que-y les marque. Nun debe conformase con vivir de las migayes que esti-y da, y nun debe aceutar los llímites qu’esti pon al so xorrecimientu y la so del so propiu futuru.

La sociedá asturiana tien d’entamar a dar pasiquinos, pero con firmeza y seguridá, pues son los qu’asentarán el so llugar nel mundiu. Tien de fixar el drechu a utilizar la so llingua propia, vindicar los sos vezos y dignificalos, aceutar que forma parte d’una cultura atlántica estremá a la mediterránea (que nun ye ni meyor nin peor, pero sí estremá).

Debe desixir que les cotes d’autogobiernu vaigan en progresivu aumentu. Tien de defendese de les agresiones esternes y non quedase cruzá de brazos aceutándoles con resignación porque naide sal en so ausiliu. Nadie va facelo, nun ye tan complicao de ver.

Tien de ver cuales son les opciones polítiques que creen qu’Asturies tien de caminar haza la mayoría d’edá.

Tien de tomar conciencia de si mesma y de les sos necesidaes.

Fadrá falta muncha aición y perseverancia. Fadrá falta que les persones que n’Asturies sí son “adultes” no que cinca a la sociedá, eduquen y convenzan a les que na so minoría d’edá societaria solo ven con almiración a so pa y traten d’imitalu en tou, esliendo asina la so propia personalidá.

Particularmente, creo que ye posible, pues al mio ver la sociedá asturiana sólo ta pigaciando. Esmolezme qu’hai pigazos de los que nun se sal. Y peor aún, que’l llar nel que s’alcuentra Asturies, devora a los sos fios más endexes en favor de los fuertes.

Y quiero pensar que ningún asturianu quier ser un fíu endexe.

Quiero una Asturies mayor d’edá.

This work is licensed under a Creative Commons Attribution 4.0 International License.