Maxi Areñes, cabezaleru del grupu Fontoria y candidatu por Oriente d’Andecha Astur:  “Ye imprescindible camudar la manera de dar y de vivir los conciertos. Ye necesario que se comprenda que la música y la cultura ye más qu’un hobby, ye una forma de vida y un importante seutor económicu”

A lo llargo la pandemia demostróse que l’actividá cultural ta perfechamente controlao, les midies de seguridá son tremendes, les cifres dicen que nel seutor de la cultura nun se dan biltos.  Puen controlase aforos, marcar distancies, facer más pases por conciertu, hai munches maneres de facer posibles les actuaciones y entendemos que ye necesario estremar les precauciones. Pero nun hai motivos pa paralizar l’actividá cultural comu se ta faciendo.

A lo llargo l’empreslle fuimos los que caltuvimos los ánimos, fiximos lo posible por apurrir el nuesu granín y fuimos emponderaos públicamente pol nuesu llabor, pero sentimos que depués se nos menospreció, el Ministru español de Cultura llegó a dicir que’l nuesu trabayu, lliteralmente “nun val pa na”. Hai munchu pelligru neses pallabres, que faen de menos un seutor imprescindible pal desendolcu d’una sociedá que, amás, tien una relevancia importante a nivel económicu.

Siendo cosciente de la dificultá del trabayu diariu de les alministraciones y la complicación de la so xera nesti intre, nun pueo dexar de reclamar la necesidá de que se mos permita darréu trabayar. Hai qu’entender que pa los que vivimos de la cultura, esti ye’l nuesu trabayu y nello hai muncha inversión detrás, de tiempu, pero tamién n’istrumentos, n’equipos…

Hai que camudar la forma d’entender la cultura, esto ye un trabayu y lo que pidimos ye que se mos dexe trabayar. ¿Les ayudes de l’alministración? Si, puntualmente necesaries, pero son pan pa güei y fame pa mañana. Ye imprescindible valorar la cultura, reconocela comu un sector económicu que mueve munches perres y que ye esencial pa la sociedá, especialmente nel so llabor de caltener la identidá y la cultura propio.

No que cinca a la música y cultura asturiana, ye necesario que se nos escuche y se nos vea dientro y fuera d’Asturies. L’arte asturianu tien de cientrar l’actividá cultural n’Asturies, por supuestu, pero ye imprescindible tamién salir del guetu que paez qu’esiste pa los que nos movemos na  cultura asturiana, hai cierta endogamia preocupante. Hai qu’abrir el círculu y dase a conocer, dientro y fuera d’Asturies, esportar calidá, que la hai y muncha.

Too ello ensin dexar de ser lo que somos, ensin perder el raigañu o la llingua, amosando lo que ye Asturies, quienes somos. Pa quienes consideren la llingua una torga, convídolos a sentir  La Traviata y a entrugase si la ópera tenía que quedar namás pa escuchase n’Italia, pol tema llingüísticu ya eso.

This work is licensed under a Creative Commons Attribution 4.0 International License.