Adrián Barbón, presidente del “Principado” y Xose Antón González Riaño, presidente de l’ALLA aconceyen pa falar del futuru del asturianu. El caberu afirma que Barbón “comparte la necesidá d’algamar la oficialidá nesta llexislatura”. Esi ye’l caberu capítulu de la serie “Oficialidá, nin sí nin non sinón tolo contrario” col que’l Gobiernu d’Asturies mos tien entretenios mientres nun se reconoz un drechu tan fundamental comu’l de la propia llingua
Pasamos a revisar los caberos capítulos d’esti apasionante culebrón:
25 d’Ochobre de 2020. El coronavirus saca de l’axenda inmediata la reforma del Estatutu d’Autonomía pa facer oficial l’asturianu “La pandemia dexa en segundu planu un debate llatente sobre l’asturianu y la so oficialidá”. Ello ye, que por agora non.
20 Payares: C’s anuncia’l pautu col PSOE Pa la paralización del procesu de la Oficialidá a lo llargo’l 2021, a cambiu del so sofitu a los presupuestos. Los partíos teóricamente favoratibles a la Oficialidá -Podemos, IU, PSOE- nun gorguten y roblen esos presupuestos. Seguimos, que non, pero agora con fecha: polo menos fasta los prósimos presupuestos.
24 d’Avientu 2020, Barbón condiciona a les matemátiques la oficialidá y declara “que habrá oficialidá del asturianu nesta llexislatura “si salen los númberos”. Espera, igual sí; pero ensin priesa y condicionao, ya diremos viendo.
3 de Xineru: El “Principado” dexa la oficialidá pal 2022, dicen que pola covid. Non, volvemos al non.
7 de Xineru: L’Academia de la Llingua Asturiana (ALLA) afirma esti xueves qu’hai un “alcuerdu plenu” ente la institución y el presidente Adrián Barbón nel sentíu de “garantizar que nesta llexislatura va algamase la necesaria reforma del Estatutu pa recoyer la oficialidá”. Ello ye que si, pero nun lo diz Barbón, sinón que manda un mensaxeru de la so bona voluntá.
Tenemos toos ganes de saber comu fina’l cuentu y cruciamos los deos pa qu’esto nun seya otra vienta de fumu, que’l si seya definitivu y se pasen de les pallabres a los fechos. Twitter ya ye espeyu d’esti deseyu y pente los munchos mensaxes al respeutu alcontramos un interesante spoiler de la película “Un gran traficante d’esclavos dizyos que los va lliberar nos prósimos años, ensin apuru, y fae que lo anuncie’l voceru del frente lliberación. Los esclavos siguen siéndolo.
F. MarquésThis work is licensed under a Creative Commons Attribution 4.0 International License.
