Ñeva’n Madrí. Ensin salir de casa, conozo l’estáu de toles carreteres de la capital española. Pueo compadeceme de les dificultaes de los madrilanos pa dir a trabayar con 40 cm de ñeve. Nel móvil del mio fiu suenen los glayios prestosos de los cuarentamil vidios de madrilanos pente la ñeve: al paecer entantu nunos barrios ballen la macarena pente lo blanco n’otros escuerren a los policies a bolazos (si, tamién na capitalona queda esperanza).

Ñeva’n Madrí y acábase’l mundiu. Son zona catastrófica, como un terremotu, oiga, qu’esto ye grave.

Namás cuando salgo a mercar el pan soi a decatame de qu’equí tamién ñevó, seique la xente sigue viviendo ensin que seya un desastre; o siendo un desastre, pero aguantándose. ¿Ñevaría tamién en Casu? ¿Cómu ta la mar? ¿Cómu yos dirá pa los Picos? ¿Y pa Degaña? ¿Afeutaría muncho’l fríu al ganao? ¿y a los pumares? ¿Ye bono o mal o pa los pumares?

Veo el parte na TPA, a ver si asina m’entero. Cuatro menutos llargos falando de la ñevaona… en Madrí. Sigo ensin saber si les carreteres asturianes tan en condiciones y pela tardi teo de subir a Onís… Buceo nes redes, contauto conocios. Asina entérome de qu’en Cabrales tienen cerca dos metros de ñeve, echo cuentes rápido, eso ye cinco vegaes más qu’en Madrí ¿En qué gráu de catástrofe se mide eso? Resulta qu’hai carreteres cortaes pero tol país, nun echen sal, nun puen salir de casa, y hai dellos pueblos ensin lluz ya ensin teléfonu; non, nun falo de la Cañada, que ye un casu llamentable, pero non l’únicu, tamién hai asturianos ensin lluz. Entérome de qu’un home morrió de friu, creo qu’en Sotres, me dicen, nun soi a alcontrar la información na prensa asturiana, que recueye’n titulares la muerte de 4 persones pol temporal: dos en Madrí y dos en Málaga. Abluco. ¿Y los dos operarios arrastraos por un argayu na ñeve nel Puertu Braña? Un d’ellos sigue enterráu, pero nun abre telediarios, yera namás asturianu.

Finalmente consigo dar con una noticia na que se nos menciona. “Asturies cede a Madrí 350 tonelaes de sal pa llimpiar les carreteres”. La verdá ye que podemos regaláyosles ensin problema: nes carreteres d’Asturies nun se usen y pa teneles almacenaes comu fasta agora ye tontería… o sedrá preferimos dir a trabayar esbariando per pistes de patinaxe. Equí vos dexo un vidiu de comu anden los caminos per Asturies, de xuro los hai más informativos pero esti abultóme relevante. 

Estes son les coses que pasen cuando les relaciones pente naciones se definen en términos de sumisión: qu’a la parte sumisa siempres se-y escaez pa beneficiu de la otra y naide s’alcuerda d’ella fasta que toca dai pel… bono, ya sabeis.

Déxovos unes semeyes recoyies pela rede pa que podais ver un pocu d’Asturies.

Que vos preste lo ñevao.