Llucía Fernández, miembru de la Executiva d’Andecha Astur, critica duramente los presupuestos aprebaos pol “Principado”, a los que tacha de continuistes ya insuficientes, y acusa a IU y Podemos d’acatar sumisamente les decisiones del PSOE

Los recientes presupuestos foron anunciaos pola presidencia del “Principado” comu los más espansivos y meyor dotaos económicamente, pero dende la so formación, Andecha Astur, siguen descontentos con ellos. ¿Onde ta’l problema?

Pa entamar, la mayor dotación vien dada poles  necesidaes muncho mayores d’una situación nidiamente esceicional,  na que se fae urxente una mayor dotación económica no social y no sanitario. Nesi sen, los presupuestos son en realidá insuficientes, ya que nun respuenden a les necesidades xeneraes pol andanciu, nin permiten superar les deficiencies del sistema sanitariu, heriedaes de décades de retayos y corrución del PSOE n’Asturies. De fechu, en función de l’actual demanda, son unos presupuestos entá más probes que los anteriores.

Sicasí, lo más grave nun ye que nun se correspuendan coles necesidaes inmensamente superiores del Pueblu Asturianu nesti intre hestóricu, sinón que son unos presupuestos continuistes que, magar el xorrecimientu cuantitativu, nun impliquen denguna meyora cualitativa, dexando a Asturies na mesma situación de dependencia, servilismu y desaniciu del texíu socioeconómicu.

¿Pué esclariar un pocoñín a que se refier con continuistes?

Cuando digo que son continuistes toi falando de que nun impliquen dalu cambeu. Magar l’incrementu presupuestariu, estos presupuestos nun suponen dengún avance real, nin no político, nin no social nin no económico.

No político, porque nun permiten dar nin un solu pasu nel camín de superar l’actual marcu políticu, con un estatutu d’autonomía impuestu, que los asturianos nun pudimos votar, y que mos dexa nuna situación de ciudadanos de tercera, dependientes siempres d’un Estáu español que mos sigue diciendo cómu y en qué gastar les perres y que sigue vulnerando drechos fundamentales, comu ye mesmamente’l casu los drechos llingüísticos.

No social, porque nun permiten facer frente al andanciu nin a les sos consecuencies económiques y llaborales sobre la población, nin muncho menos permiten que los servicios públicos superen los efeutos de la llarga y nefasta xestión d’Areces y de sucesivos gobiernos del PSOE.

No económico, porque nun ufren denguna meyora que permita recostruyir el tan maltratáu texíu socioeconómicu asturianu, nin encarar el futuru con opciones reales de recuperanza, sinón que nos caltién nel camín marcáu poles polítiques de les caberes décades que, comu sabemos, suponen l’imperiu del llibre mercáu, el poder de gran capital y la progresible redución de drechos y rentes de la clas trabayaora.

En resume, estos presupuestos nun respuenden a les necesidaes del Pueblu Asturianu, sinón que suponen apautase pa xestionar la decadencia.

Sicasí, los grupos políticos que se nomen d’izquierdes na Xunta Xeneral votaron a favor d’ellos…

Cierto, nesi sen Podemos ya IU tornen a fallar a los sos votantes, amosando ser a cencielles los encontos del PSOE pa llevar alantre les sos polítiques.  La importancia d’estos presupuestos, pola so mayor dotación y pol intre hestóricu nel que se xestionen, yeren una oportunidá única pa presionar y facer valir los sos votos en beneficiu de los asturianos. Sicasí, sofíten los presupuestos vergoñoasmente, ensin desixir dengún tipu de contrapartía -que se sepa- nin algamar dengún tipu de porgüeyu pal conxuntu del Pueblu Asturianu. Ello representa una rendición ensin precedentes pela so parte y una renuncia esplícita a ser l’alternativa política qu’Asturies necesita con urxencia, amosando qu’esta alternativa tien de venir de fora la Xunta Xeneral.

This work is licensed under a Creative Commons Attribution 4.0 International License.