Los pescaores asturianos reciben el 2021 con más retayos sobre les cuotes pesqueres y alvierten de la inviabilidá de munchos barcos coles cifres que se tan baraxando
Va muncho que nun son bonos tiempos -tampocu- nel seutor pesqueru. La sistemática baxada de dalgunes cuotes, comu la de la xarda qu’esti añu pierde otru 35%, súmase a la incertidume de les consecuencies del Brexit nel seutor y al amenorgamientu de ventes de pexe y mariscu qu’impliquen los preslles na hostelería.
“Pa delles especies nun va merecer la pena salir a la mar” reconocíen dende la Federación de Cofradíes de Pescaores d’Asturies. Ye’l casu de la xarda, cuota na que nel 2019 el gobiernu español desvió parte de la cuota de la flota asturiana pa la vasca por mor de les presiones polítiques, perdiendo 300 kg sobre una cuota que ya yera entós misérrima y que nun fexo sinón retayase nos caberos dos años. Tamién nel 2019 el repartu de posibilidaes pesqueres aprebáu pol Conseyu de Ministros de Pesca de la Xunión Europea retayaba en fasta un 40’7% los cupos de cuasi toles especies. El 2021, entá ensin definir del tou, nun pinta bonu tampocu pa los pescaoes; por agora anúnciase que de xarda namás van poder pescar un 65% del tope marcáu en 2020, pesi a la fin del plan de recuperación de la especie.
La Federación de Cofradies albidra que l’amontu del 12% anunciáu na cuota de bonitu nun ye abondo pa permitir pescar fasta ochobre y queden pendientes d’un aconceyamientu en Madrid y de conocer l’alcuerdu completu del brexit pa valorar dafechu les sos espeutatives pa esti añu.
Llucía F. Marqués
This work is licensed under a Creative Commons Attribution 4.0 International License.
