El conflictu cola Pastelería LA SUIZA parte de la denuncia d’una de les sos emplegaes, qu’ afirma que durante dos años tuvo faciendo alrodiu de 80 hores estres al mes obligatories, ensin remunerar, denegándose-y asinamesmo’l drechu a vacaciones.

Arriendes d’ello según pallabres de la trabayaora –que cuenta con un informe mélicu nel que se confirmen los abusos- les vexaciones de calter sesual yeren avezaes na pastelería, con comentarios y entrugues so la so ropa interior y menacies del tipu“si pierdes tal apuesta desnúdeste”, siendo vezu que recibiere wasaps personales, dalgunos incluso con imáxenes o insinuaciones sesuales, que la emplegada aguantó pola necesidá de caltener el so trabayu. Lo que finalmente llevó a la trabayaora a denunciar la so situación foi la denegación d’atención durante’l so embarazu, nel que llegó a sufrir dos menacies d’albuertu.

Les presiones sociales, el boicot a la pastelería y les continues manifestaciones de sofitu a la trabayaora frente a la mesma forciaron, sigún afirmen los propietarios de la empresa, al cese d’actividá en setiembre del 217. Agora ocho persones, pente militantes, esmilitantes y activistes, enfréntense a un xuiciu que podría finar con penes de cárcele, dende los dos años y mediu propuestos pola Fiscalía dica los 15 pidíos pola acusación particular. Les acusaciones son de coación y obstrución a la xusticia, seique toles movilizaciones foren pacífiques y la gran mayoría cuntaben cola correspondiente autorización.

Según la CNT, sindicatu qu’entamó les movilizaciones, esti ye “Un xuiciu escontra’l sindicalismu n’Asturies como nun se recuerda dende’l procesu 1001. De más de 30 compañeres llamaes a declarar imputase a 8 a les que se yos piden penes de cárcel fora de toa razón”. La CNT ya tuvo que depositar 60.000€ de fianza que podrien llegar hasta los 600.000€ si se cumplen los deseos de la patronal.

El xuiciu entamó güei. Les acusaes acudieron al Xulgáu arropaes pola presencia de decenes de persones que s’averaron a ufri-yos el so apoyu.

Nuria Prendes