El Presidente d’Asturies foi’l principal focu de crítiques pola so xestión de la crisis, que calificaron d’improvisá ya irresponsable, acusándolu de rendise a les presiones de OTEA y de favorecer a les grandes empreses frente a les más humildes, castigando a un seutor del que dependen más de 30.000 families y nel que se verificaron menos del 2% de los contaxos
La hostelería xunióse ayeri al marxe de OTEA, organización que representa a la gran patronal de la hostelería, nuna fuelga estrá de movilizaciones, convocada por Hostelería con Conciencia, Autónomos y Trabayadores del Nalón, Asturies Suma, SOS Hostelería, l’Asociación d’Hosteleros del Uviéu Antiguu y l’Asociación de Cafeteríes del Principáu.
Toes estes organizaciones coinciden na so aceptación del zarru, siempres que les cifres lo avalen, neto que defenden la necesidá de caltener les másimes midíes de prevención sanitaria, pero acusen al gobiernu asturianu de face-yos pagar pola so falta de previsión y la so irresponsabilidá. Dende Asturies Suma definieron de cruel la situación, que consideren frutu de la improvisación y de los erros continuos de les alministraciones.“6128 y 6752 €, esos son los sueldos del presidente del Principáu y l’alcaldesa de Xixón, dos persones que lleven meses intentando faenos creer que los nuesos trabayaores tienen que vivir con 7 00 al mes, cobraos con retrasu, nel meyor de los casos, dos persones a les que-yos paez abondo sobrevivir siendo autónomu con menos de 500 euros al mes, colos negocios al 30% de rendimientu, pero con el 100% de gastos, dos persones que se queden perplexes al escuchar que les ayudes nun lleguen o lleguen meses tarde, siendo amás insuficientes “.
Dende Asturies Suma acusaron tamién a Adrián Barbón de xugar non solo cola economía sinón cola salú de los asturianos, “variando les PCR p’aplicar les restricciones al so gustu, venciendo a les presiones pa volver a entamar l’actividá en Navidaes, presumiendo de nun precisar l’hospital de campaña de Cagüeñes pa dempués nun tenelo llistu cuando se descontroló la presión hospitalaria y protexendo a Javier Martinez, presidente de OTEA tres l’escándalu del Sporting…“
Na so intervención Lucia, d’Hostelería con Conciencia, aportunó no mesmo “N‘Avientu pidióse-yos que nun cedieren, que nun tomaren decisiones precipitaes por presiones empresariales y dempués de selmanes de lluces, cais atarraquitaes y enganíes del consumu, llegó’l momentu de xustificar la falta de previsión y les males decisiones y ye entós cuando se nos señala, en llugar de poner el focu nos verdaderos culpables“. Tamién retó a la presidencia a decretar el zarru completu de la hostelería, en llugar de caltenelos abiertos nestes condiciones con tal d’aforrase les ayudes que-yos correspuenden.
La xornada de llucha incluyó barricaes na autopista, una cadena humana alredor de la Xunta Xeneral del Principáu y concentraciones, siendo la más numberosa la de Xixón. Yá anunciaron una nueva concentración esti vienres a los once delantre de la sede d’EDP nel Parque’l Gas de Xixón y nun refuguen tomar midíes más fuertes nun futuru: “Si esto non meyora“ anunciaron“vamos empezar a ser un pocu más agresivos“.
F. Marqués
This work is licensed under a Creative Commons Attribution 4.0 International License.
