L’ésitu de ventes del emocionante reconocimientu a toa una xeneraciónn con 35 histories de güeles anónimes escrites poles sos nietes y nietos, esgota la primer edición en menos d’un mes
La historia de les nueses güeles ye la historia d’heroínes anónimes que criaron, educaron y llucharon por dexanos un futuru meyor. Les sos vivencies probablemente nun vayan volver a repetise y nun hemos d’escaeceles. Por eso Puru Remangu asoleyó’l 9 d’avientu ‘Güeli. Histories d’amor y remangu’, un llibru que recueye 35 histories de güeles asturianes escrites poles sos nietes y nietos. La publicación aporta otra vegada a les llibreríes tres d’escosar los primeros 500 exemplares en namás 20 díes.
Too entamó con un post nel Instagram de la marca de ropa Puru Remangu el pasáu marzu: “La historia de les nuestres güeles, tamién ye parte nuestra. Nun dexemos que s’escaezan les sos vivencies, les aventures, les penuries d’una guerra. Fala con to güela, escribi la so historia”. La idea daba forma a la iniciativa #30DíesConRemangu qu’añalmente llanza esta marca y qu’enllenó esta rede social coles esperiencies d’Olvido, Saluda, Esther, Ángeles, Marina, Julia y otres tantes muyeres anónimes qu’hasta agora nun recibieron nengún homenaxe públicu, pesie a ser una parte imprescindible de la nuestra historia.
L’éxitu d’esta iniciativa y el componente emocional y históricu merecía qu’estos testos nun quedaren namás n’Instagram y por eso Puru Remangu -col permisu de caduna de les y los autores-, decidió compilar les 35 narraciones nel llibru ‘Güeli. Histories d’amor y remangu’. A lo llargo les sos 96 páxines puen lleese vivencies como les de deprender a montar en bici, viaxar a Venecia, emigrar a Francia, trabayar de carbonera o nuna fábrica de conserves, montar un cine na cuenca del Nalón… Histories escrites dende’l cariñu, que representen a toa una xeneración y que gracies a esti llibru van quedar pa la posteridá.
Con remangu y n’asturianu
Detrás de ‘Güeli’, ta Puru Remangu, firma que se define como “dalgo más qu’una marca de ropa, una seña d’identidá”. Un proyectu basáu en dar visibilidá a la identidá de les muyeres asturianes dende una perspectiva feminista y innovadora. Les sos camisetes -con eslóganes como “Fañagüeta”, “Feminista, Reputante y con Remangu” o “Fala con to güela”-, y la so actividá nunes redes sociales que tienen más de 10.000 siguidores, tán teniendo perbona acoyida. Too ello col asturianu como única llingua d’espresión, daqué que la Xunta Pola Defensa de la Llingua Asturiana reconoció en 2020 dándo-y el Premiu Andrés Solar a Enar Areces, la publicista que cuando tornó p’Asturies dempués de 11 años emigrada, decidió dedicar la so vida profesional a esti proyectu enllenu de remangu.
Redaición InfoAsturies
Puntos de venta:
ONLINE: www.pururemangu.com
AVILÉS: Librería Clarín, Librería Casona
A VEIGA: Librería Patefa
CANGAS: Librería Treito
GRAU: Librería Las Dos Vías
L’ENTREGU: Llibrería Sol
L’INFIESTU: Librería Rima
LA FELGUERA: Librería Clarín, Mixture Concept
LES ARRIONDES: Librería Gestión
MIERES: Librería La Pilarica, La Llocura
NOREÑA: Copistería La Semeya
SIERO: Librería Naredo
TINÉU: Librería Asturias
UVIÉU: Llibrería Trabe, Librería Cervantes, Librería La Palma
VILLAVICIOSA: Librería Suárez
XIXÓN: La Habitación Propia, La Revoltosa, Librería Paradiso, Buva Concept, Puru Remangu (oficina)
This work is licensed under a Creative Commons Attribution 4.0 International License.
