La sablera de Bañugues ta incluyida na Rede Natura 2000 y nel LIC-ZEPA Lluanco-Cabu Bustu, siendo un de los puntos más interesantes d’observación d’aves migratories n’Asturies.
Magar eses figures de proteición mediuambiental y a la llexislación sectorial estatal, va años que se llevanta en plenu dominiu públicu un chigre que yera yá illegal cuando se tramitó l’esllinde (1995-2003), que tuvo ordes de paralización d’obres y de reposición al estáu anterior y que, sicasí, frayando la llegalidá y ensin solicitar siquier la concesión prevista na Llei de Mariñes (que nun solicitó hasta 2010 y que nun se podría conceder pola so illegalidá), siguió furrulando.
Más palantre, el Proyectu d’Adecuación de la Sablera de Bañugues punxo en marcha una serie d’obres pa la meyora del mediu natural y pa recuperar el dominiu públicu. Sicasí, magar espropiase diverses propiedaes de la redolada, nesti proyectu esclúyese espresamente’l Chigre La Playa, un edificiu de dos plantes, ocupando una superficie de 106,4 metros cuadraos y catalogáu llegalmente como Chigre ensin autorizar, qu’evidentemente perxudica la redolada natural y el paisaxe.
Nel 2015 Andecha Ástur -al traviés de la collaboración del diputáu Jhon Iñarritu- presentó al Congresu un informe de la situación acompangáu d’una riestra d’entrugues sobro la situación alministrativa de la edificación.
La rempuesta gubernamental nun foi clara nin concluyente, polo que se repite la cuestión, añediendo amás el fechu de que dende la so apertura nel 2003 hasta la publicación de la solicitú de concesión trescurrieron más de seis años, bien llueñe del añu llegal de plazu pal resolvimientu de la mesma. Otros once años trescurrieron dende entós ensin que se recibiera respuesta, y foi esti mes de Xineru cuando finalmente s’espublizó nel BOE’l resolvimientu pol que s’alcuerda conceder la concesión al Chigre La Playa, ignorando dafechu la incongruencia llegal y medioambiental que la permanencia  l’edificiu implica.

Llucía F. Marqués