La midía d’Ispeción de Trabayu, qu’encamienta a los emplegadores de trabayaores del llar a regularizar les sos cotizaciones anantes d’abril, nun algama a les contrataes a tiempu parcial -la gran mayoría- nin a los miles d’emplegaes en prietu -cerca’l 40%-
La midía va destiná a les persones emplegaores del Sistema de Llar que rexistraron contratos a tiempu completu a emplegaes del llar, con salarios per debaxo del SMI, esto ye, con unes retribuciones mensuales inferiores a 950 euros en 14 pagues o a 1.108,33 euros, nel casu de ser 12 pagues. La inspección va actuar si nun actualicen les cotizaciones de el trabayadores, polo que dieron de plazu hasta’l 31 de marzu pa que comuniquen los salarios actuales de les sos trabayadores, casu contrariu van ser oxetu de control de la Ispeción de Trabayu y Seguridá Social.
Anque les asociaciones de trabayaores del llar amosaron el so prestu énte l’anunciu’l Ministeriu de Trabayu, el fechu ye que la midía va algamar a bien poques de les afeutaes pola precariedá nel seutor, y non solo porque la inmensa mayoría de les emplegaes del llar nun tán -siquier llegalmente- emplegaes. La práutica totalidá de les llimpiaores y cuidaores parten el so trabayu ente delles cases, pasando unes poques hores en caúnu, polo que, sacantes que trabayen pa una empresa de llimpieces, lo más probable ye que les sos xornaes nun sumen les hores necesaries pa contratos de 8 hores diaries por emplegador. Nos casos nos que si faigan eses 8 hores -o más- nun ye infrecuente que seyan contrataes por horarios menores a los reales, polo que tampoco van ser beneficiaes por esta midía; al contrariu, hai sectores que sollerten de qu’esta midida, necesaria, de nun dir acompangada d’otres, va incentivar entá más la economía somorguiada dientro’l seutor.
This work is licensed under a Creative Commons Attribution 4.0 International License.
