La denuncia interpuesta por Andecha Astur de presuntu homicidiu por imprudencia y otros dos delitos incluyíos nel Códigu Penal lleva a la fiscalía a investigar la responsabilidá del presidente y otros cuatro acusaos nos fechos
La muerte, el 1 de xineru, de dos trabayaores del Sirviciu de Caltenimientu Carreteres del Gobiernu asturianu demientres cumplíen el llabor encamentáu polos sos responsables, podría llevar a estos a xuiciu. Por agora, la Fiscalía investiga a los cincu presuntos culpables siñalaos na denuncia d’Andecha Astur: Adrián Barbón Rodríguez (Presidente`l Gobiernu), Alejandro Jesús Calvo Rodríguez (Conseyeru de Mediu Rural y Cohesión Territorial), Jorge García López (Viceconseyeru d’Infracadarmes Viaries, Movilidá y Territoriu), Esther Díaz López (Direutora Xeneral d’Infracadarmes Viaries y Portuaries) y Manuel Antonio Serrán Gómez (Xefe’l Sirviciu de Caltenimientu y Esplotación de Carreteres). Los delitos de los que se yos acusa son ún d’homicidiu por imprudencia, otru escontra los drechos los trabayaores y finalmente un delitu escontra l’Alministración Pública, incluyíos los tres nel Códigu Penal.
La bayura de datos nos que s’afita la denuncia d’Andecha Astur inclui testimonios y dellos informes científicos que taben en conocencia del Gobiernu d’Asturies y qu’alvertíen de les pésimes condiciones nes que lleva años alcontrándose la carretera AS-253 (de Cabanaquinta a Puirtu Braña) asina comu alertaben del riesgu grave d’ábanos y de la ineficacia de les escases midíes proteutores. Estos informes ufren tamién un completu estudiu de les midíes de proteición que sedríen necesaries en ca casu y que evitarien esti y otros acidentes.
Afitándose nesos estudios, la denuncia presentada por Andecha Astur recueye que “Barbón y el so Gobiernu saben que tolos años hai ábanos nesta carretera, que ponen en pelligru a los vecinos, los usuarios y los trabayaores de caltenimientu; y saben que los ábanos de 2005, 2008, 2009, 2013, 2017, 2018, 2019 y 2020 foron d’importante entidá y consecuencies, pero enxamás añadieron a l’AS-253 nueos elementos de seguranza nin aplicaron dengún plan específicu de prevención llaboral a los trababayores de caltenimientu de la carretera, nin fexeron xeres preventives de forestación de la fastera, nin repararon nin renovaron eficazmente les malles de montaña, nin prauticaron preventivamente los ábanos controlaos por esplosión, toes elles midíes siñalaes como necesaries nos distintos estudios. Les autoridaes nun cumplieron les sos obligaciones d’actuación nesta carretera, sicasí, mandaron ellí a los sos trabayaores de caltenimientu, sabeores de los altísimos riesgos que corríen, más nun temporal comu’l qu’había na fecha l’acidente mortal. Poro, la muerte de los dos compañeros en Rufrío tien responsables políticos. Y Andecha Astur escoyó la denuncia llegal enantes que’l silenciu cómpliz que se ta prauticando n’otros ámbetos”.
Dende la formación nacionaliega declararon nun comprender comu los sindicatos con presencia nel sirviciu de caltenimientu de carreteres permitieron l’asistencia a la concentración y cincu minutos de silenciu n’homenax a César y Virgilio, a del Conseyeru de Mediu Rural y Cohesión Territorial, Alejandro Calvo, ún de los presuntos culpables del homicidiu por imprudencia, qu’aprofitó la presencia de los medios de comunicación pa intervenir intentando blanquiar les sos responsabilidaes.
Redaición InfoAsturies
This work is licensed under a Creative Commons Attribution 4.0 International License.
