El caos burocráticu y la dependencia llegal per parte’l “Principado” del Gobiernu de Madrid obliga a repitir les xestiones de solicitú del IMV a cuasi 9.000 beneficiarios del Salariu Social Básicu Asturianu

El IMV aportó como la gran noticia del añu para toles persones en situación de vulnerabilidá económica y foi presentáu como un salvavides pa la población cuando s’atopaba en situación d’emerxencia. Dempués vieno’l caos, la falta d’información, les dificultaes para consiguir la documentación n’una dómina con cuasi tola alministración semicerrada, la non contratación de personal pa la so xestión y les inherentes esperes, les sospreses, como qu’a les families beneficiaries retiraríase-yos la prestación por fíu a cargu, la comprebación de que les ruines subíes d’importes respeuto al SSB nun cubren les perdes por esta retirada de los “puntos”, los retrasos y agora, como colofón, la obligación de repitir los trámites pa cuasi 9.000 persones que la so solicitú, yá tramitá pol Gobiernu d’ Asturies, ye invalidá pol Gobiernu d’España.

Estes solicitúes correspuenden al más d’un terciu de los 21.000 beneficiarios del Salariu Social Básicu Asturianu, que’l so espediente tendría de treslladase darréu, al traviés d’un consentimientu, al INSS. El cambéu de normativa del Istitutu Nacional de la Seguridá Social, que nun considera fiable’l sistema de verificación asturianu, refuga agora esti treslláu, polo que tendrán de repitir la so solicitú -información que munchos d’ellos nun recibieron- perdiendo’l drechu al pagu retroactivu de los meses ensin conceder.  A esto hai que sumar los miles de casos de duplicación, ello ye, de persones que por erru alministrativu tán percibiendo importes tantu del IMV como del SSB, ensin que tengan forma de saber si tendrán de devolver esos importes -la mayoría- o si son complementarios.

Pero, amás de los perxuicios personales a los solicitantes, hai que considerar los xeneraos p’Asturies: de nun reconocese la retroactividá d’estos espedientes, l’Estáu nun reintegrará a Asturies les perres alantraes pol “Principado” en forma de SSB, que teóricamente tendría de ser abonáu pol Estáu en conceutu de IMV, un total de más de 32 millones d’euros hasta’l momentu. Amás prevése un nuevu colapsu tantu na Seguridá Social como nel sistema de Servicios Sociales, yá sobrecargáude xeres alministratives.

Nuria Prendes

This work is licensed under a Creative Commons Attribution 4.0 International License.