Darréu l’encarcelamientu del cantante Pablo Hazel poles sos lletres y la brutalidá policial de los caberos díes, hai convocaes dos concentraciones mañana martes, en Xixón a les 19:30 na Plaza’l Parchís y n’Avilés a les 19:00 n’El Parche
L’encarcelamientu del raperu abre l’alderique sobro la falta de drechos y llibertaes y trae a primer plana de l’actualidá nel Estáu la bayura de presos políticos que caltién España nes sos cárceles. Poro, les movilizaciones convocaes nun respuenden solo a la desixencia de lliberar a una persona concreta, sinón a la necesidá de baltar un sistema políticu y xudicial que fae posible la illegalidá de la música y la pallabra. Amás, pa los convocantes faese imprescindible denunciar la fortísima rempuesta policial a les protestes nes cais n’otros puntos del Estáu, fechos que s’enmarquen dientro d’una dinámica de violencia xeneralizada ya inxustificada per parte de les fuercies de seguridá que, si ya yera fuerte anantes, viose reforciada pola mayor presencia de les mesmes nes cais darréu les restriciones a la movilidá impuestes pola crisis sanitaria.
“Pola llibertá de Pablo Hasél, polos detenios, polos ferios, polos presos políticos, polos nuesos drechos. ¡La solidaridad ye la nuesa meyor arma! ¡Amnistía total!” ye’l llema col que’l Comité d’Asturies pola Amnistía convoca la protesta en Xixón y “¡Ya Basta! Contra la represión y pola Llibertá d’espresión” ye l’escoyíu polos convocantes n’Avilés.
Redaición InfoAsturies
This work is licensed under a Creative Commons Attribution 4.0 International License.
