La estaya más moza de la formación nacionaliega presentará formalmente la candidatura a la Fundación “Princesa de Asturias” pa la qu’abrió, amás, una campaña de sofitu en Change.org
Recién abrió’l plazu de receición de candidatures pal premiu “Pueblu Exemplar d’Asturies” que ca añu entrega la familia real española, “honrándolos” cola so visita, nun actu de vasallaxe dignu de la más escura Edá Media. Esti añu, y aprofitando el fuerte venceyu de la casa real colos Emiratos Árabes, Andecha Mocedá decidió presentar la candidatura de la capital de los Emiratos Árabes, Abu Dabi, como protesta cómica ante esti humildante “premiu” y denuncia de los desmanes de Juan Carlos de Borbón.
Cómo forma d’espardimientu d’esta aniciativa entamaron tamién esta mañana una campaña de recoyía de robles al traviés de Change.org, onde pue alcontráse la candidatura, presentá con notable sentíu del humor. “Defendemos esta candidatura y, amás, pidimos a la Fundación que nun considere causa d’esclusión el fechu de qu’Abu Dabi s’allugue a 6.000 kilómetros d’Asturies, porque tien de valorase, perriba too, que la población d’Abu Dabi amuesa un sentimientu talu d’asturianía que ye igual al sentimientu que tien el Pueblu Asturianu de ser un “principado” español”, declaren.
Redaición InfoAsturies
This work is licensed under a Creative Commons Attribution 4.0 International License.
