Los estudios realizaos sobro restos cerámicos topaos polos arqueólogos nel xacimientu confirmen que n’Álava se trabayaba la plata y el cobre ente l’IV y l’II anantes de Cristu
L’estudiu del xacimientu d’Álava entamó col afayu casual per parte de los vecinos de la zona’l sieglu pasáu de dellos hachos de talón qu’indicaron la posible presencia d’un pobláu na redolada. Arriendes de ello, y gracies a la iniciativa ya inversión, mayoritariamente privada, de numberoses entidaes, ente les que destaca la Fundación Valdés Salas, y al traviés del proyectu Beriso, empecipiáronse les pesquises qu’adulces van apurriendo interesantes datos sobro’l que puede ser un de los escasos puntos de metalurxa con plata del noroeste peninsular.
Mientres les campañes d’escavaciones realizaes en 2019 y 2020 nel castru topóse un llote de ciscos cerámicos que, una vegada realizáu l’estudiu arqueométricu nel Llaboratoriu de Microscopía Lletrónica y Microanálís del Istitutu d’Hestoria del C.S.I.C., acoten la esistencia d’un taller metalúrxicu nel que se realizaben oxetos de cobre y plata mientres la Edá del Fierro.
Pal estudiu de los restos metálicos Ignacio Montero y Óscar García-Vuelta recurrieron a la téunica de espectroscopía d’enerxía dispersiva por Fluorescencia de rayos X, aplicá con espectrómetros portátiles, según microscopía lletrónica de barríu, utilizando tamién microanálisis por enerxía dispersiva de rayos X, téuniques al traviés de les qu’alcontraron chiscadures de plata na superficie de los restos cerámicos, un afayu escepcional por mor de la antiguedad de les pieces y l’escasez d’esti metal nel rexistru arqueolóxicu del noroeste peninsular. L’estudiu entá sigue, cola esperanza d’atopar información del orixe de los materiales emplegaos.
Nuria Prendes
This work is licensed under a Creative Commons Attribution 4.0 International License.
