Les multitudinaries manifestaciones d’anteriores 8Ms nun traxeron denguna meyora significativa nel últimu añu, no que cincaa la llucha feminista. Pero nun mos engañemos, eso nun quier dicir que la llucha nun sirve, sinón bien al contrariu, qu’hai que lluchar más

Les muyeres siguen siendo les que más carecen les cifres del paru, les peor pagues, les más esplotaes y, anguañu más evidentemente,  les principales encargaes del cuiriáu d’enfermos. Namás 7 de cada cien persones que pidieron excedencia por curiu fueron homes.

La inseguridá nes cais nun amenorgó, les agresiones nel llar amontáronse mientres los confinamientos y la doble xornada, impuesta pola necesidá económica de trabayar coles mesmes que se ye cuidadora y ama de casa sigue recayendo cuasi n’esclusividá sobro les muyeres asturianes. Tamién protagonicen les muyeres les cifres de llares más probes y la de mayor soledá.

Según los datos,  estrayíos d’un informe ellaboráu pol Institutu Asturianu de la Muyer, n’Asturies viven averai 533.000 muyeres, un 52,3% de la población del país, proporción que se dobla cuando falamos de persones mayores de 80 años. El promediu de families monomarentales supera enforma la media estatal, con un total de 18.400, siendo de fechu los llares más probes. El 54’6% de les persones que viven soles n’Asturies son muyeres, 3 de cada cuatro cuando falamos de mayores de 60 años.

Como va dellos llustros, les muyeres asturianes siguen diendo per delantre de los homes tocantes a finalización d’estudios universitarios y presentación de tesis doctorales na Universidá d’Uviéu, especialmente na estaya de ciencies, daqué que nun s’espeya na posterior consecución de puestos de trabayu d’altu nivel.

N’Asturies, l’empléu femenín ta bien concentráu por seutores, especialmente nel seutor servicios, destacando l’ámbetu de la hostelería, llimpieza y curiaos -los más precarios-, siguiendo en cifres el númberu de muyeres dedicaes a l’alministración pública, la educación y les actividaes sanitaries y de servicios sociales. A pesar de la so mayor formación, malpenes s’atopen muyeres en puestos direutivos o d’investigación.

La fienda salarial n’Asturies sigue siendo la mayor del Estáu: una asturiana tien de trabayar 15 meses y 17 díes pa ganar lo mesmo qu’un home en 12 meses. L’añu del Covid traxo a les muyeres una cayía del 36% d’emplegu, agravada poles escedencies solicitaes pa curiar a persones dependientes, na so cuasi totalidá (92’8%) solicitaes por muyeres.

Esti añu traxo tamién la paradoxa de que les manifestaciones femenines seyan les úniques en ser cuestionaes, depués de concentraciones multitudinaries de toa triba, collor ya orientación, con o ensin midíes de seguridá. Sicasí, los datos espeyen que les sos revindicaciones siguen siendo, lliteralmente, vitales.

Llucía F. Marqués