El Sindicatu Asturianu d’Enseñantes defende que la homologación ye la solución pa finar cola discriminación salarial que carez el profesoráu asturianu
Na mañana del llunes, 8 de marzu, axuntóse la Mesa Sectorial d’Educación pa aldericar como única tema de la negociación del segundu Plan d’Evaluación Docente que va afeutar al conxuntu del profesoráu asturianu. Convién recordar qu’esta tema, el de la evaluación d’actividá docente, foi un asuntu que dixebró fondamente al profesoráu asturianu mientres los postreros diez años en dos bloques que caltienen posiciones irreconciliables. Per un lláu ANPE y UXT, partidaries d’esti sistema que condiciona la retribución final a la productividá, midía esta en base al cumplimientu d’unos criterios; por tanto, modalidá retributiva lligá a una evaluación que, nestos momentos, esiste solamente n’Asturies. Nel otru llau, SUATEA y Comisiones Obreres vienen refugando esa fórmula, proponiendo como alternativa un xorrecimientu salarial basáu na creación d’un complementu específicu asemeyáu al qu’esiste nel restu de les comunidaes autónomes.
La posición de SUATEA foi contraria a l’aprobación d’esti segundu plan qu’afonda n’aplicación de midíes de calter neolliberal que contribúin a estratificar y estremar al conxuntu de la plantiya docente, utilizando un elementu tan sensible como ye’l de la retribución del profesoráu qu’apaez estremáu nun númberu creciente de categoríes salariales. A ello hai qu’añedir l’agravante de la fienda ente’l personal de Primaria y el de Secundaria, que manca gravemente al primer grupu.
Nel intre de la xunta, SUATEA espunxo la so propuesta d’homologación que vien plantegando dende va tiempu tantu ente’l profesoráu como a la mesma Conseyería, al Gobiernu asturianu y a los Grupos Parlamentarios de la Xunta Xeneral. Dende’l so puntu de vista, esiste una grave fienda territorial ente la masa salarial que se percibe nos otros territorios del Estáu y n’Asturies. La desemeyanza salarial media colo que se cobra n’otros territorios asítiase en redol a los 300 € y raspia los 400 € si comparamos con Navarra. Esto débese a que la mayoría de los territorios, cuando recibieron les sos competencies en materia educativo, decidieron crear un complementu específicu de calter autonómicu, daqué que tamos esperando qu’asoceda n’Asturies dende l’añu 2001.
SUATEA plantegó una enmienda a la totalidá de la propuesta d’esti segundu Plan d’Evaluación docente, proponiendo una homologación del sueldu del profesoráu asturianu al traviés de la creación d’un Complementu Específicu Autonómicu por aciu una xubida llineal ya igual pa tolos cuerpos docentes. Pa llevar a cabu esa xubida, habría que partir de les partíes presupuestaries de los Planes d’Evaluación y amontala en función de la cantidá necesaria hasta algamar el nivel d’homologación. A lo llargo la xunta, aportunaron en conocer cuálos son los argumentos que se sofiten dende la Conseyería pa inclinase pola evaluación docente en llugar de la homologación ensin recibir denguna rempuesta, magar que esta postrera significa un repartu más xustu y equitativu qu’afeutaría al conxuntu de la plantiya docente y contribuyiría a amenorgar les diferencies esistentes ente los distintos cuerpos.
Frente a les acusaciones procedentes d’ANPE y UXT, que SUATEA tilda de calumnioses, remembren que SUATEA demanda y sofita un xorrecimientu salarial pal profesoráu asturianu que suponga d’una vegá por toes la homologación con retribuciones que se perciben nel restu del Estáu, pero refuguen que seya un incentivu basáu na evaluación del profesoráu, que consideren estratificaor y discriminatoriu. “El profesoráu tien de saber qu’Asturies ye la única Comunidá qu’aplica esti modelu escluyente y segregador y que, dende va venti años, l’Alministración niéga’l cobru d’un complementu específicu autonómicu que beneficiaría a tol profesoráu por igual, tal como asocede nel restu de CCAA”.
This work is licensed under a Creative Commons Attribution 4.0 International License.
