La Conseyería d’Educación vien d’espublizar la convocatoria de les pruebes pa sacar los certificaos de competencia llingüística n’asturianu del presente añu 2021, tornando a convocase la preba del nivel B2, que se ficiera l’añu pasáu per primer vez, ya incorporándose tamién la del nivel C1.

Les prebes de certificación son una manera d’acreditar la competencia comunicativa en llingua asturiana y tan afayaos a les pautes del Marcu Común Européu de Referencia, un istrumentu que dexa plantegar equivalencies ente les distintes enseñances y esámenes d’idiomes. Según esti marcu, el nivel B2 correspuende a un nivel intermediu, en cuantes que’l C1 correspuende a un nivel avanzáu.

Ca preba almite un máximu de 300 aspirantes. Si hai más solicitúes, les places van axudicase d’alcuerdu con un sistema d’orde alfabéticu que tien como puntu de partida les lletres del primer apellíu a partir de DS (resultáu d’un sortéu públicu). Va haber un primer plazu d’almisión, del 5 al 16 d’abril, nel que s’axudiquen les places del cupu; y un segundu plazu d’iscripción onde se formalice la inscripción y se paguen los precios públicos correspondientes. Namás s’almite la solicitú d’almisión nuna de les pruebes por persona.

Les prebes de les destreces de comprensión de testos orales, comprensión de testos escritos y producción y coproducción de testos escritos van facese’l sábadu 9 d’ochobre, mientres que les prebes de produción y coprodución de testos orales van facese de magar el día 18 d’ochobre.