Los puntos aceutaos de la Proposición non de Llei en defensa de les llingües minorizaes del Estáu, presentá y defendía polos compañeros nel Congresu de Andecha Astur al traviés de Agora Repúbliques, EH Bildu, impliquen l’aceutación de la Oficialidá del Asturianu

El PSOE reclamó finalmente que la proposición Proposición non de Llei presentada por EH Bildu a favor de «reconocer la realidá plurillingüe, poner fin a la imposición del castellán y acabar con toles discriminaciones» defendía por Bildu y sofitada por nacionalistes, independentistes y UP, se votare puntu por puntu y tres de trabayoses negociaciones, ayeri dábase a conocer l’aceutación de trés de los ocho puntos de la PNL,  incluyendo’l separtáu qu’encamienta al Gobiernu a impulsar les reformes estatutaries que seyan necesaries pa que l’asturianu y l’aragonés se conviertan n’oficiales, anque refugaron la obligatoriedá de conocencia de les mesmes pa los funcionarios qu’empresten serviciu en territorios con llingua propia.

De la mesma manera, nun precariu exerciciu d’equilibriu, el PSOE blindó l’español al refugar la desixencia d’acabar cola exclusividá de la que gocia na normativa estatal y nos etiquetaos y refugaron que’l restu de les llingües gocien del mesma reconocencia que’l castellán.

La iniciativa, impulsada por diez organizaciones que trabayen en pro de la reconocencia del asturianu, l’euskara, el catalán, el gallegu y l’aragonés, namás cuntó col sofitu total de los grupos EH Bildu, BNG, Compromís, CUP, PNV, ERC, PDCAT y UP. Demientres los sos respeutivos turnos, el PSOE tachó d’inconstitucional la pretensión de que toles llingües del Estáu gocien d’iguales derechos y  la drecha española amosóse enraxonadamente contraria al testu presentáu por EH Bildu, con declaraciones como que  «los nacionalistes usen les llingües como arma política» señalando que  la Proposición non de Llei presentada, «Tien como oxetivu la destrución d’España».

El testu solicita esplícitamente «toles acciones posibles pa que les llingües propies estremaes del castellán gocien del mesma reconocencia y los sos falantes de los mesmos drechos y deberes que se-y reconocen al castellán», asina comu «impulsar les midíes afayaices pa estender la conocencia xeneralizada de les llingües nos sos respectivos territorios», territorios, como recordó Mertxe Aizpurua, vocera d’EH Bildu nel Congresu, nos que vive’l 45% de la población del Estáu español. El diputáu del BNG, Néstor Rego, resaltó que «solo dende’l supremacismo llingüísticu pue llegase a nun querer entender que si falamos gallegu, asturianu, catalán o euskera ye porque ye la nuesa llingua».