El preslle de colexos ya istitutos rurales, los más afeutaos pol descensu de places escolares, da puxu al abandonu los pueblos
Solo l’últimu cursu, la cayida de la matrícula escolar en primaria y secundaria foi de 1.648 escolinos. El descensu poblacional y el continuu procesu d’avieyamientu cobra les sos víctimes nos servicios d’educación y atención a los menores, una y bones la política aplicá na educación pública nun ye la d’amenorgamientu de ratios y aumentu de la calidá educativa, sinón la d’amenorgamientu de costos y aglomeración d’estudiantes.
En total, Asturies va perdiendo 621 aules de Primaria y Secundaria nes dos caberes décades, la gran mayoría d’elles nes zones rurales, agravando con ello’l procesu de denegación de servicios qu’emburria a la población, especialmente a los más mozos y a les families con menores, a abandonar los pueblos, lo que de la mesma revierte nel zarru de más aules.
Para la Conseyería d’Educación, esto nun ye un problema, yá que consideren que la dispersión ye, xuntu cola cayida de la natalidá, una de les grandes torgues pa la educación n’Asturies, daqué qu’ellos xustifiquen, non en términos calidá educativa, sinón económicos: el costu por escolín na zona rural ye hasta siete vegaes mayor qu’el d’un estudiante en fastera urbana, puntu de vista qu’inflúi poderosamente nel preslle d’unidaes.
Llucía F. Marqués
This work is licensed under a Creative Commons Attribution 4.0 International License.
