La suma de reconocimientos de drechos llingüísticos a nivel estatal fae posar la vista nos partíos na Xunta Xeneral, a los que correspuende agora dar el siguiente pasu camín del reconocimientu de los drechos de los asturfalantes: la Oficialidá
Va una selmana’l Congresu los Diputaos sofitó, con 194 votos, el separtáu de la propuesta presentada por EH Bildu pola dignidá de les llingües, nel que s’abría la puerte a la demanda de la oficialidá del asturianu. Agora, el Tribunal Constitucional dicta sentencia sobre’l recursu de Vox contra la modificación del Reglamentu d’Usu del asturianu na Xunta Xeneral, colo que blinda l’usu llibre del idioma nel parlamentu d’Asturies.
Dellos coleutivos, tantu culturales comu políticos, destacaos pola so defensa l’asturianu coinciden en matizar la emportancia d’esta racha positiva, aporfiando en que nun pue quedase a mediu camín. Asina, el presidente d’Iniciativa pol Asturianu, Iván Llera aportunó’n que “con esta sentencia demuéstrase que les instituciones tienen que siguir dando pasos en tolos ámbitos pa normalizar l’idioma. Queremos consiguir una igualdá de drechos de la ciudadanía independientemente de la llingua que falen y pa ello la única ferramienta ye la oficialidá; ye’l momentud’iguar esta anomalía constitucional y treslladar esa mayoría y consensu social a la Xunta Xeneral ”. Pel so lláu, Llucía Fernández, d’Andecha Astur, declaró que “Nun podemos sinon felicitanos d’estos pasos alantre y tamos arguyosos de lo conseguío nel Congresu polos nuesos compañeros de coalición. El gobiernu del Principado quédase ensin esculpies pa nun avanzar y los asturianos nun mos conformaremos más que cola Oficialidá, darréu y que seya completa, que garantice pa los asturfalantes los mesmos drechos que pa los falantes d’español, y si hai a quien esti drechu fundamental yos paeza pocu amable, tendrá que dir faciéndose a la idega.”
Esta riestra de noticies positives pal asturianu ta poniendo nerviosos a los partíos más declaradamente españolistes; tres de la perda del xuiciu nel Costitucional por parte de Vox, les enraxonaes declaraciones en tuiter de la fundadora d’UPyD, Rosa Díez, rocen el ridículu “Los rapacinos asturianos” escribió “que ya de por si tienen un futuru complicáu nuna de les rexones más deprimies d’España, van camín de que la coalición tósica pente comunistes y socialistes yos impongan la educación en bable. Esta xentuza nun tien perdón.”
Pel so lláu, el presidente del Principado, Adrián Barbón, que llevaba nel so programa lleutoral la oficialidá, caltiénse nel puntu d’equillibriu pente decir pocu y facer nada, mentantu continúa na so posición d’allargar plazos y fala timidamente d’una oficialidá “amable” que llegue “pocu a pocu”.
Nuria Prendes
This work is licensed under a Creative Commons Attribution 4.0 International License.
