Acordies declara’ coleutivu, na tarde del 13 de marzu apaeció na terraza del so ll0cal un despliegue policial d’al menos 14 policies, dalgunos coles porres desenfundaes; pente ellos viéronse axentes de la unidad especial UPR. Nesi intre, declaren, les persones presentes na terraza, -pente les qu’había neñes- cumplíen la normativa vixente.

Ensin motivu xustificable nin dar dala desplicación, el dispositivu policial bloqueó les salides de la plaza, na qu’ hai un parque infantil enllenu reciella, faciendo formación delantre la terraza del establecimientu. Nesi intre un de los axentes dirixóse a un de los veceros, que taba lliando un pitu, ordenando-y colocar la mazcarina ya indicando-y que nun se pue fumar na mesa, polo que la persona en cuestión llevantóse a fumar a la distancia llegal. Ye entos cuando varios axentes se llancen sobre ella, reduciéndola a porrazos. Otra persona acércase pa mediar y tamién ye reducía ya inmovilizá con téuniques que dende Lata de Zinc consideren desproporcionaes y de dudosa llegalidá, hasta’l puntu de finca-y la rodiella en pescuezu.

Estes dos persones esposaes con violencia son apartaes y entamen una serie d’intimidaciones individuales y muncha prevocación. Burles y rises ente l’ansiedá provocada, identificaciones mesa por mesa (dalgunes con llectura d’antecedentes en públicu) y amenaces de multes por causes inxustificaes.

Les dos persones que fueron reducies y detenies pasaron una nueche en calabozos y tras un xuiciu rápidu tienen que pagar una multa de 1200 euros por resistencia, costes d’abogacía y dos años d’antecedentes. Una tercera persona enfrentase a una posible multa ente 600 y 2000 euros.  Nesi sen, el coleutivu abre una Paypal de sofitu pa pagar les multes: skontralabusopolicialnasturies@gmail.com. Cabe señalar que estes persones nun taben consumiendo nin teníen nenguna droga illegal y que dende’l puntu de vista de los presentes, nun presentaron resistencia dalguna.

Tantu trabayaores de Lata de Zinc comu veceros declaren carecer repercusiones sicolóxiques y emocionales polo ocurrío y dende’l  proyeutu cultural y hosteleru declaren que necesiten espresar que “les secueles a causa de la pandemia son cada vez más asfixiantes y  consideramos que la violencia inxustificada ya innecesaria sufria’l pasau sábadu, solo incrementa’l malestar xeneral de les persones. Paeznos despreciable que nun contestu tan difícil y nun sector tan fostigau como’l hosteleru, tengamos que sentir una amenaza por dir a trabayar, o que la xente que quier comer o tomar dalgo nun bar, cumpliendo tolos protocolos, s’esponga a vivir una situación de terror por esfrutar del pocu arruelu que mos queda”