La novela “Baxo’l pumar”, de Marga Pedrayes, escrita n’asturianu, ye la segunda obra de l’autora xixonesa

La plataforma de crowfoundig Verkami acueye estes selmanes una recaldación de fondos pa la edición de la novela “Baxo’l pumar”, na que la escritora Marga Pedrayes cunta la hestoria de Colás, un home del sieglu XIX, el so peculiar ñacimientu y la so obsesión por facer la so propia sidra.

La hestoria de “Baxo’l pumar” ñació va dellos años cola idea de retratar la evolución d’un pequeñu llagar familiar a lo llargo d’un sieglu y mediu. Tres dellos cambeos, Marga consideró que tendría de ser un llibru de rellatos n’asturianu, por ser l’idioma del ámbitu sidreru asturianu, onde narraren la obsesión del protagonista, Colás, por una pumarada. Esta obra foi finalista en 2016 del premiu novela “Xosefa Xovellanos”, lo qu’animó a l’autora a siguir buscando la forma d’editala.

La obra, que tien na xestión editorial a Cuatro Gotes Ediciones tará llista alredor del mes de mayu y toles persones que collaboren na mesma van apaecer citaes nel llibru como mecenes.

Pa qu’esto seya posible l’autora punxo en marcha la campaña de recaldación en Verkami, onde amás de col llibru puedes facete con packs nos que s’inclúin marcapáxines d’encaxe fechos pola propia autora o zapiques artesanales.

Marga Pedrayes, ñació nel barriu xixonés de Pumarín en 1970 y esta sedrá la so segunda novela. Los sos trabayos anteriores son microrrellatos de temática diversa, que fueron escoyíos en dellos concursos y la so primer novela d’ambientación histórica, “Marca Vikinga”, autoeditada en 2012.

Enllaz a la campaña en Verkami.

Redaición InfoAsturies

This work is licensed under a Creative Commons Attribution 4.0 International License.