Del 1 al 4 d’abril va cellebrase la XI Primer Sidre l’Añu, una edición marcá poles restriciones sanitaries que torguen el so normal desendolcu pero que caltién la mayoría de les sos actividaes

La Primer Sidre l’Añu recueye añalmente la tradición asturiana de les espiches de Semana Santa, nes que s’abren los toneles cola sidre nuevo y se comparte en comuña la so primer preba. La que ye d’avezu la mayor espicha d’Asturies, que cuenta con sidre de prauticamente tolos llagares asturianos, tendrá de cellebrase esti añu en versión reducio ya en parte telemático, pero los sos organizaores -la revista LA SIDRA y la Fundación Asturies XXI-  considereren que ye perimportante caltener vivos los vezos, malque tenga de ser adautaos, pa esquivar na midía lo posible’l riesgu de que pente los daños collaterales del andanciu se sume la perda cultural de les trac¡diciones sidreres.

La selmana pasá tuvo llugar el Concursu  de la Meyor Primer Sidre L’añu 2021, na que Sidra Huerces foi escoyía la meyor sidre d’ente lo presentao polos cuasi 40 llagares participantes. Esa sidre puede prebase ya nes sidreríes collaboraores cola PSLA -La Montera Picona de Ramón, Poniente, Nuevo Parque, El Veleru, Tírate al Matu, Jaime y El Centenario- y cola presentación de tres corchos a la revista recíbese una mazcarina sidrera.

La naguración oficial tendrá llugar nel Muséu del Pueblu d’Asturies el xueves 1 d’abril, y nella cellebraráse l’echáu del culete nagural y la entrega del premiu a la Meyor Primer Sidre 2021.

El vienres 2 d’abril, tendrá llugar el Sidracrucis, esti añu fragmentáu en grupos de 4 o 6 persones -en función de si tan en terraza o interior , que percorrerá los chigres que cunten cola Meyor Primer Sidre 2021 y que se visibilizará nes redes sociales, col emplegu del hastag  #Sidracrucis, que  col de #PrimerSidreLAñu intentará algamar una importante repercusión mediática.

El sábadu 3 d’abril, el Llagar El Duque acoyerá la tastia guiada de les 5 primeres sidres clasificaes nel Concursu a la Meyor Primer Sidre L’Añu -Huerces, Viuda de Angelón, Riestra, M.Vigón y Ramos del Valle-, a les que se sumará la del  llagar anfitrión y una “sospresa” entá por desvelar.  La tastia impartiránla los dos espertos Manuel G. Busto y Joaquín Fernández, y el propiu Jose Antonio Norniella, llagareru de Sidra Huerces, que presentará la so sidre ganaor. Como les places son llendaes y queden perpoques disponibles, la tastia va emitise de magar les 16:30  online -en https://www.youtube.com/user/INFOLASIDRA; y tamién n’Instagram: @revistalasidra-.

El domingu 4 a les 12:30 entamará’l xuráu del Concursu de Sidre Casero Fecho en Maera, con entrega premios a les 14:30 aprosimadamente ya’l concursu de l’Asturianada y Sidre, cellebraráse on-line dafechu, cola apertura d’una llista de reprodución específica dientru youtube, y emisión per RRSS d’interpretaciones d’asturianaes rellacionaes cola sidre.

Arriendes d’ello, del 1 al 4 d’abril fadráse un importante llabor d’espardimientu en RRSS de vidios y semeyes rellacionaes con esta y anteriores ediciones de la Primer Sidre L’Añu, y la utilizacion del hastag #PrimerSidreLAñu, actividá pa la que se pide’l mayor sofitu social posible.

Pa más información sobre horarios ya iscripciones:

PRIMER SIDRE L’AÑU / MEYOR PRIMER SIDRE L’AÑU / SIDRACRUCIS / TASTIA GUIADA / IX CONCURSU DE SIDRE CASERO FECHO EN MAERA

This work is licensed under a Creative Commons Attribution 4.0 International License.