En 2019, la mediana del salariu mensual real de la mocedá d’ente  18 y 35 años yera menor que’n 1980, con cayíes que van dende’l 26% pa aquellos con edaes ente 30 y 34 años fasta’l 50% pa los de 18 a 20 años, según el informe presentáu por Fedea. L’actual crísis xenerá pol andanciu fae esperar una cayía asemeyada, que se sumará a la anterior

La mocedá asturiana retruca nes redes “tranquilos, el 40% de cero ye cero”

La fundación d’Estudios d’Economía Aplicao, FEDEA, vien d’emitir un informe nel que analiza l’impautu de les crisis nel mercáu llaboral xoven, analizando los datos de los caberos trenta años. L’estudiu amuesa que ca recesión xenera un recular na situación llaboral de la mocedá con un amenorgamientu que pue algamar el 40% y que ye acumulativu, ello ye, que nun llega a recuperase dafechu  na recuperación posterior, lo que genera una deriva negativa nes condiciones aniciales d’emplegu de les sucesives xeneraciones.

Les conclusiones, valides a nivel européu, apunten a que l’impautu de les crisis nel emplegu mozu ye más acusáu en fasteres nes que se parte de situaciones d’altu desemplegu xuvenil y problemes na cadarma del mercáu de trabayu, comu ye nidiamente’l casu asturianu.

El desemplegu ye un de los factores que más influye na cayía de los salarios. Asina, pa los recién llicenciaos nun gráu universitariu, una xubía d’un puntu porcentual de la tasa de paru nel añu d’entrada al mundiu llaboral asociase a una cayía de la renta salarial mensual de 1’5 puntos porcentuales nos vinientes dos años. L’efeutu del xorrecimientu del paru nos sueldos nun dexa de notase fasta siete años depués de recuperase les tases anteriores d’emplegu. Aplicando esa información a les xorrecientes cifres de desemplegu xuvenil asturianu desplícase l’encadenamientu de “crisis” y la fuxía de la mocedá a la gueta de mercaos llaborales más petecibles.

Nuria Prendes

This work is licensed under a Creative Commons Attribution 4.0 International License.