El “Principado” nun dio información sobro’l destín d’eses perres, que tornarán al so arca y que taben destinaes nel so presupuestu al separtáu d’aides sociales

La falta d’información a la hora de tramitar l’Ingresu Mínimu Vital y la llaceriosa xestión del Salariu Social por parte del “Principado” permitió que les families que recibíen ingresos per ambes víes consideraren que yeren complementaries. “Depués de tou, sumando les dos aides algamábemos escasamente los 350€ por persona al mes” declara una persona afeutá. Hai que remembrar qu’oficialmente los ingresos inferiores a 500€ al mes por persona son consideraos probitú, polo que incluso percibiendo les dos prestaciones les families nun salíen de la so situación de riesgu de marxinalidá. Amás, foron dellos los casos nos que foron mal informaos nos Servicios Sociales, dándoseyos a entender qu’efeutivamente, les aides yeren complementaries.

Munches d’estes families aprofitaron esi piqueñu respiru que daba lo qu’ellos consideraben un “estra” p’afrontar inversiones pendientes, comu dentistes, gafes, reparaciones nel llar o tratamientos mélicos llargamente pospuestos. Agora alcuéntrense na situación de siguir faciendo frente a esos pagos, viendo comu los sos ingresos se retayen a la metá y teniendo qu’encarar, amás, una devolución de fasta 6.000 € que, casu de nun satisfacer, se yos retirará de la so perceición mensual.

Esi nun ye l’únicu problema na xestión del IMV, una aida que prometía sacar a la población d’una probitú que medra esponencialmente y que nun algamó más qu’al 20% del so oxetivu, viniendo a sustituyir na mayoría de los casos una aida ya esistente, el Salariu Social, que yera simultaneable cola aida por fiu a cargu, agora anulada pa perceutores del IMV. Del Ingresu Mínimu descuéntase tamién les Aides al Alquiler o cualisquier otru complementu que les families pudieren recibir pa dignificar la so vida. Nel casu asturianu, a tou esto súmase’l despropósitu de que más de 9.000 asturianos sigan esperando pola tramitación de la so pidición, por mor de la falta d’entendimientu pente’l gobiernu español y asturianu.

Otra de les noticies que recibieron recientemente los perceutores del IMV ye la obligación de presentar declaración de la renta, seique pola cantidá d’ingresos nun sedría necesaria. Casu de nun ser presentada a tiempu, l’aida retiraráseyos darréu.

Llucía F. Marqués

This work is licensed under a Creative Commons Attribution 4.0 International License.