La insistente intervención del Conceyu de Xixón para torgar la reivindicación de los trabayaores de Vauste -antigua Tenecco- nun atopa respaldu xurídicu
El Xulgáu de lo contencioso alministrativo nº1 de Xixón vuelve dar a la razón a los despidíos en Casu Caseta, conocíu asina pola caseta d’obra na que dellos trabayaores caltienen una “asamblea permanente” dende’l mes de xineru, como midía de protesta para desixir la reincorporación de los 60 trabayaores que se vieron afeutaos pol Espediente de Regulación d’Empléu (ERE) presentáu pola empresa como un de los pasos pa salir del concursu d’acreedores.
La caseta, allugá nes cercaníes de la factoría, yá foi desallugá por orde del Conceyu’l 26 de febreru, pero una primer sentencia de los tribunales reconoció-yos el drechu a permanecer ellí, dempués de que’l sindicatu CSI –que lleva años anunciando l’esmantelamientu tapáu de la empresa– denunciara énte los xulgaos esta decisión.
Con esta son trés vegaes yá les que la Xusticia da la razón a los ocupantes de la caseta, reconociéndo-yos el drechu a llevar alantre la so revindicación.
Esta nun ye la primer vegada que los tribunales tienen que mediar nel conflictu Vauste, anque sí’l primer casu nel que los trabayaores non solo s’enfrenten a la empresa y a los fondos utres, sinón tamién al propiu Conceyu de la so ciudá. En marzu del 2020 les elleiciones sindicales fueron anulaes nuna sentencia del xulgáu de lo social nº3 de Xixón por escluyir illegalmente a la llista de la CSI. Otra sentencia anulaba, en xineru del añu pasáu, el despidu disciplinariu d’un emplegáu y la sanción de dos meses de suspensión d’emplegu y sueldu impuesta pola direición de Vauste (antigua Tenecco) a Nacho Fuster, Secretariu Xeneral de la CSI, como castigu poles sos denuncies al fondu utre Quantum Partners por incumplimientu del so compromisos en materia d’inversiones p’asegurar el futuru de la fábrica de Xixón. Primero que eses, los trabayadores de Vauste atropaben yá 5 victories llegales contra les actuaciones de la direutiva de la empresa.
Tres el progresivu desaniciu de Vauste son munchos los que ven una trama d’intereses empresariales y personales amestaos a la trama carbonífera, na que tán implicaes empreses tan renomaes nel ámbitu de la protesta llaboral como NMR o EBHI y que, con sofitu istitucional, tien de resultes la inasumible perda de puestos de trabayu y l’esmantelamientu del texíu económico asturianu.
Llucía F. Marqués
This work is licensed under a Creative Commons Attribution 4.0 International License.
