Diez meses depués del so esbarrumbe, dalgunos restos del Horru de Vis tán amontonaos nuna finca embaxo una llona, otros metíos nuna cuadra y otros entá tán albentestate nel llugar del esbarrumbu. Nun hai ñicios de la recostrución prometía

Andecha Astur denunciare énte la Fiscalía Superior la responsabilidá que tienen nel esbarrumbu del Horru de Vis Adrián Barbón, la so Conseyera Cultura (Berta Piñán) y otros responsables de l’Alministración. La Fiscalía vese obligá a reconocer que tola llexisllación na qu’Andecha Astur sofita la denuncia ye procedente pal casu y tien plena vixencia, polo que reconoz la responsabilidá del presidente, pero al mesmu tiempu escúlpialu recurriendo al desconocimientu de los dueños de la mítica pieza del padremuñu asturianu asitiá n’Amieva.

Nel so informe la Fiscalía reconoz que’l Gobiernu de Barbón sabía dende hai años del grave estáu de deterioru que carecía l’horru, dando la razón a Andecha Astur cuando señala que l’Alministración tien la obligación llegal de  xixilar, controlar y executar sosidiariamente los llabores necesarios pa caltener el bien protexíu, siendo un delitu contra’l padremuñu l’aición destructiva escontra un bien cultural por omisión de les aiciones necesaries pa caltenelu.

Al mesmu tiempu, la Fiscalía vien d’ordenar l’archivu les dilixencies d’investigación abiertes, nuna resolución apiná de contradiciones, que, sigún Andecha Astur, tan “toes elles dirixíes a protexer les culpes que con evidencia señala la llei na Alministración”. Pa ello, utilicen l’argumentu del desconocimientu de los propietarios del bien, esculpiándolos darréu por nun tener costancia de la inclusión del horru, en 2018, nel Inventariu de Padremuñu Cultural d’Asturies.

Andecha Astur señala que la esculpación de les responsabilidaes del Gobiernu asturianu sofitándose en que nun conocía los dueños del horru ye un motivu inesistente na llei. “Acoyese a ello sólo se pue interpretar comu una maniobra cómpliz pa tapar les responsabilidaes de Barbón, Berta Piñán y otros responsables de l’Alministración en materia padremuñu”, declaren.

Per otru llau, la resolución de la Fiscalía reconoz que la Casa Conceyu d’Amieva comunicare al Gobiernu la so incapacidá téunica y económica pa garantizar primero la pervivencia del horru y llueu la so recostrución. Entantu dalgunos restos del Horru de Vis tán amontonaos nuna finca embaxo una llona, otros metíos nuna cuadra y otros entá tán albentestate nel llugar del esbarrumbu.

Nesta situación, con unos dueños qu’entá nun son conocíos na so totalidá y con una Casa Conceyu ensin recursos, ye inútil que la Conseyería requiera a la propiedá un proyeutu téunicu pa la recostrución del horru, comu fexo publicitariamente tres la so ruina, anunciando la pronta recostrución del horru polo qu’Andecha Astur desixe al Gobiernu d’Asturies qu’actúe sosidiariamente pa garantizar la pervivencia d’esta emportante pieza del padremoñu asturianu, entamando la urxente recostrución d’oficiu del Horru de Vis.

Per otru lláu, los nacionaliegos reclamen l’apertura darréu de nueos calces d’aídes pal caltenimientu de los horros y paneres d’Asturies, comu padremuñu protexíu que son.

Nuria Prendes

This work is licensed under a Creative Commons Attribution 4.0 International License.