Andecha Astur pide que se condone la delda de los afeutaos o que, de nun facese, que les perres se destinen de manera tresparente ya inmediata a fines sociales: “Si l’estrañu modelu de “socialismu” que carecemos en Madrid y n’Asturies pue invertir 126 millones € pa participar nel Conseyu d’Alministración de Duro Felguera, si se pue “perdonar” a la banca más de 60.000 millones € pol so rescate, si se puen marafundiar 25 millones € nuna Casa Real… ¿por qué nun se pue condonar a los más esfavorecíos una delda de la que nin siquier son responsables?”

N’Asturies, la xestión del Ingresu Mínimu Vital (IMV) tuvo astráu de tracamundios, erros alministrativos y sobre tou, falta d’información dende l’entamu. Los posibles beneficiarios pasaron por meses de congoxa nos que naide yos daba istruciones nidies sobre qué facer o cuáles yeren los sos drechos, 9.000 tuvieron que ver comu les sos solicitudes de treslláu del Salariu Social Básicu (SSB)yeren anulaes y tuvieron que repetir les xestiones. Amás, la Conseyería de Drechos Sociales y Bientar del Gobiernu d’Asturies nun foi quien a interrumpir los ingresos del SSB,  nin a alvertir a los perceutores de qu’ambos ingresos yeren incompatibles. Depués de tou, declara N.M.P “sumando los dos salarios nun llegábemos nin de lloñe a los 400 euros por persona, nun ye que fuere tampocu una barbaridá”; asina les coses, la mayoría de los prestatarios asumieron la doble paga como’l so drechu, sumando  los dos salarios  durante un periodu d’ente 8 y 11 meses, siendo ello que munchos siguen nesa situación.

Los afeutaos tan recibiendo agora cartes del SSB informándoyos del fin de la prestación y comunicándoyos la esistencia d’una delda que, en dalgunos casos, algama los 6.000 €. La redación de la carta, intimidatoria, pocu clara y acusadora, dexa claro que la non devolución de los ingresos que l’alministración fizo por error acarretará graves consecuencies, lo que dexa a 14.000 persones -recordemos, ya en riesgu d’esclusión- na difícil situación de facer frente al pagu d’una delda de la que nun son culpables con unos ingresos que nel meyor de los casos dan pa sosistir.  Per otru lláu, pa considerar fechu el pagu los afeutaos non solo tendrán de facer l’ingresu dando los sos datos, sinon que tienen de facer llegar el xustificante del mesmu a la Conseyería por rexistru, daqué que nun s’indica na carta y que pue resultar una xestión complicada, especialmente pa persones con pocu acesu a la teunoloxía y nunos tiempos en que la mayoría les xestiones se resuelven telemáticamente.

Andecha Astur considera inaceutable que seyan los beneficiarios del IMV los que tengan de facer frente a les consecuencies de la ineptitú y mala xestión del Gobiernu de Barbón, desixe al “Principado” qu’asuma la responsabilidád’estes deldes, procediendo darréu a la so total condonación o, en casu de nun facelo, que s’informe puntualmente del destín d’eses devoluciones, un dineru que correspondía, según los presupuestos del añu 2020 a atender les necesidaes de los más esfavorecíos al traviés de los Servicios Sociales y que nun pue tener otra finalidá que nun seya ésa “Nun queremos qu’eses perres acaben formando parte d’un misteriosu fondu B, pos los Gobiernos de la FSA-PSOE son bien poco daos a la tresparencia y bastante aficionaos a marafundiar fondos públicos de formes estrañes. Queremos que se condone la delda, pero, en tou casu, si’l Gobiernu de Barbón escueye una posición puramente capitalista y d’esplotación de los más débiles, desixiremos que la delda cobrá torne íntegramente a asuntos sociales”.

Nel so escritu proponen concretamente, que les perres de les devoluciones vaigan destinaes a complementar la escasísima aída que representa l’Ingresu Mínimu Vital y a paliar la perda de la Aída por Fiu a Cargu cola que se castiga a les families perceutores del mesmu.

Nuria Prendes

This work is licensed under a Creative Commons Attribution 4.0 International License.