“Asturies precisa superar l’anormalidá democrática na que vivimos, y ver reconocíos drechos tan esenciales como la oficialidá de la nuesa llingua nacional” declaren dende la formación nacionaliega, qu’acusa al gobiernu asturianu d’amparar l’agresión facista

Andecha Astur defende que l’actitú de los diputaos facistes de Vox cuando aleguen nun pescanciar l’asturianu nes sesiones de la Xunta Xeneral, ye nidiamente belixerante y que tres de l’agresión llingüística hai una intencionalidá política nidia. Pa ellos, les diputaes y diputaos de Vox mienten a les clares “atalanten perfechamente a la sociedá asturiana nes cais, nos mercaos, nos tayos… Nun se pue considerar más qu’un insultu y una agresión la postura de “nun entender” una llingua que, comu l’asturiana, tien un nivel tan altu d’afinidá cola española, por derivar dambes del llatín”. Nun se trata de que nun la pescancien, aporfien, sinon que ye un ataque radical contra la identidá asturiana.

” Llantar intervenciones repetíes en dos llingües o facer entrega obligá d’una torna al español son númberos de pista pa facer creyer que tenemos montáu un circu llingüísticu que, en rialidá, nun esiste.”  De fechu, la midía de contratar tornaores o la recién propuesta pol PSOE pa siguir el xuegu a VOX nun esiste nin nos parllamentos catalán y gallegu, pesi a comunicase con normalidá na so propia llingua.

Pa la formación nacionaliega, la postura del PSOE al blanquiar l’ataque facista antroxándolu comu un conflictu llingüísticu ye convertise en cómpliz d’esi facismu agresor. El PSOE ya se punxo del lláu de VOX tres de les caberes elleiciones, cuando yos otorgó un grupu parllamentariu qu’en drechu nun yos correspondía.

Nuria Prendes

This work is licensed under a Creative Commons Attribution 4.0 International License.