El PP presenta ante’l  Congresu una aniciativa pa que se pronuncie contra de la reconocencia del asturianu como llingua oficial y l’Arzobispáu refuga involucrase na presentación de la versión n’asturianu de La Biblia

Entama a vese la llume a la fin del tunel llingüísticu. Los gobiernos asturianu y español, presionaos por un pueblu que nun se rindió en décades de llucha pol drechu a falar y por una Xunión Europea que reclama respetu a les llingües minorizaes, van avanzando posiciones, seique seya mui pali que pali. Partios hestóricamente antiasturianos, que fexeron tolo posible por reprimir, castigar y afogar l’asturianu, comu ye’l casu del PSOE, ya nun se permiten posiciones tan claramente contraries, ya incluso saquen réditu políticu d’un aparente cambeu de bandu, mentantu siguen nadando pente dos agües.

La España más fonda, católica ya intransixente, sicasí, siéntese menaciao ya enseña’l dentame. VOX torga -na midía que puede- l’usu del asturianu na Xunta, la Conseyería d’Educación retira validez a les titulaciones d’asturianu y agora’l PP presenta nel Congresu una iniciativa cola que pretende que la Cámara Baxa amuese la so refuga a la declaración del asturianu como idioma oficial n’Asturies. Faenlo, por ciertu, alegando que “el castellán ye la llingua mayoritaria d’Asturies”, reconociendo tacitamente con ello la llexitimidá de la llingua asturiana y reduciendo la cuestión a una falacia basao na proporción d’asturfalantes.

La ilesia nun podía quedase atrás y  l’arzobispáu refuga acudir a la presentación de la torna de la Biblia al asturianu, que tuvo llugar esta selmana nel Real Institutu d’Estudios Asturianos y na qu’hebio otres ausencies significatives, comu la de los representantes del Conceyu d’Uviéu y la Universidá d’Uviéu.

Llucía F. Marqués

This work is licensed under a Creative Commons Attribution 4.0 International License.