Tres 14 años de la so última conderga en prisión so l’acusación “d’asociación illícita y propaganda illegal” el martes salió dende la cárcel d’Herrera del Llurdiu, en Manzanares, Ciudá Real, el militante comunista Manuel Arango Riego. La so compañera, Isabel Aparicio, finó na cárcele, víctima de desatención mélica

Con 72 años, de los que permaneció presu 22, y la salú delicao, Manuel Arango, hestóricu militante comunista y resistente revolucionariu salió en llibertá esti martes, siendo recibíu nun actu de solidaridá y homenaxe.

Nacíu en L.laciana, nel senu d’una familia minera, Arango creció nun ambiente marcáu pola represión fascista, “que convirtiera’l valle mineru nun llugar paecíu a un campu de concentración”. La influencia de les fuelgues mineres y  les idegues polítiques antifacistes que recibía de la so redolada fueron determinantes na so implicación na llucha contra’l facismu y l’esplotación capitalista. En 1974 entra a militar na OMLE (Organización Marxista Leninista d’España), precursora del PCE (r), participando viviegamente na reconstrucción d’esti partíu, nel que sigue militando. Manuel Arango denuncia dende entós “la persecución policial constante tando na clandestinidá y la vixilancia sistemática, les prevocaciones y amenaces cuando m’atopaba na llegalidá; l’aplicación de la tortura cada vez que fui deteníu; según les mios diverses estancies en prisión, onde fui sometíu a la política represiva que s’aplica a los presos políticos”.

Dende la so curtia autobiografía revolucionaria, publicada na páxina PRES.O.S, Manuel Arango denuncia “la política d’esterminiu planiáu de los presos políticos, sofitada na dispersión carcelaria y nes midíes d’aislamientu, según nun bon númberu de prohibiciones y restriciones de los más ellementales drechos”.

Anguañu atópense presos en cárceles españoles más de doscientes persones poles sos idees polítiques, incluyendo militantes comunistes y antifascistes (dos d’ellos asturianos), independentistes  y numberosos deteníos por participar en manifestaciones y reivindicaciones de drechos.