400 emplegos menos, 3.000 paraos más, paru xuvenil del 37’63%, 28.900 paraos de llarga duración, espoxigue de los trabayos a tiempu parcial y 10’11% de llares nos que tolos miembros tan en paru

El INE acaba de faer públicos los resultaos de la EPA correspondiente al primer trimestre de 2021, nel que siguieron les restriciones a l’actividá y la movilidá. Según esta encuesta, caltiénense 384.400 empleos n’Asturies, perdiendo un total de 3.300 nel últimu añu, 400 esti trimestre. Estos datos consideren como “ocupaos” a el trabayadores n’ERTE. El mayor pesu d’esta perda d’emplegos cientrase nel sector servicios, que perdió nun añu 7.600 puestos de trabayu; nel estremu opuestu atópase la industria, que ta recuperando parte del emplegu destruyíu.

La tasa de paru xube seis décimes respeutu al trimestre anterior, siendo especialmente alarmante ente la mocedá, estaya na que la tasa algama’l 37’63%. D’ente los paraos, cuasi la metá lleva más d’un añu buscando emplegu y poro nun percibe sosidiu por desemplegu. Un de ca cuatro paraos lleva más de dos años nesa situación.

Xube tamién el porcentaxe de los llares asturianos nos qu’hai delles persones que pueden y quieren trabayar, pero nun atopen emplegu, llegando al 10’11%.

Non solo hai menos trabayos, sinón más precarios: destrúyese principalmente emplegu a tiempu completu, entantu que crez la proporción de contratos a tiempu parcial, siendo asina que el 14’2% de los trabayadores asturianos tán emplegaos so esta modalidá. Finalmente, rexistrase un intensu desaniciu d’emplegu temporal: -4.800 nel caberu trimestre y -8.100 nel últimu añu.  La gravedá d’esti datu finca en que les persones contrataes nesti tipu d’emplegu queden al marxe de l’aición protectora de los ERTEs.

Redaición InfoAsturies

This work is licensed under a Creative Commons Attribution 4.0 International License.