“Sospriende que’l Conceyu consienta estes baltes en suelu públicu pa beneficiar un pelotazu priváu, n’una ciudá qu’ellos nos dicen que quieren faer caltenible” declaren dende la Coordinadora Ecoloxista d’Asturies

Les llabores de baltu entamaron na cai Fueru d’Avilés, col desaniciu de tolos árboles del camín en Gaxín, poro, en suelu públicu. Con ello, Avilés pierde non solo un polmón, sinón un de los sos pocos caminos tradicionales de tránsitu piatonal, destacáu, hasta agora, pola so vexetación.

El Parque del Pozón foi la otra zona afectada, baltándose nun solu día más de 40 árboles nel parque, pesi a que lo anunciao pol consistoriu coles obres de meyora nun contemplaba balta dalguna de los árboles llantaos hai 40 años; tán menaciaos munchos más. D’esta forma peracábase la desapaición d’una de les poques zones urbanes con árboles que quedaben nuna redolada natural, n’una de les ciudaes más contaminaes del país.

Ye sobradamente conocíu l’impautu benéficu de los árboles pal mediu ambiente urbano. Nes ciudaes la presencia d’árboles, naturaliza’l paisaxe, amenorguen l’impautu’l tráficu xenerando osíxenu, asorbiendo diósidu de carbonu y reteniendo la povisa y partícules que se caltienen nel ambiente.

Redaición InfoAsturies

This work is licensed under a Creative Commons Attribution 4.0 International License.